Madaxdii hore oo walaac ka muujiyay maqnaashaha Puntland, dalabna u jeediyay Xasan

[Deeq A.]

Muqdisho (Caasimada Online) – Madaxdii hore ee dalka iyo siyaasiyiinta mucaaradka ah ee ka qeyb-galay shirka wadatashi ee lagu soo gaba-gabeeyay Muqdisho ayaa Madaxweyne Xasan Sheekh Maxamuud la wadaagay walaaca maqnaashaha Puntland.

Madaxdii hore iyo siyaasiyiinta ayaa madaxweyne Xasan la wadaagay walaaca ay ka qabaan ka maqnaashaha Puntland ee Wadatashiga arrimaha masiiriga ah, xilli uu khilaaf siyaasadeed kala dhaxeeyo Villa Somalia.

Waxay madaxweyne Xasan usoo jeediyeen inay muhiim tahay ka qeyb-galka Puntland ee kulamada wadatashi ee arrimaha masiiriga ah, sidaas darteedna sida ugu dhaqsah badan ay madaxda sare ula fariistaan maamulka, si xal looga gaaro tabashada ay qabto.

Sida ay ogaatay Caasimada Online, waxay madaxweyne Xasan ugu baaqeen inuu wada-hadal la furo hoggaanka maamulka Puntland, si ay hadda kadib qeyb uga noqdaan kulamada muhiimka ah, ayada oo Puntland ay ka maqneyd kulankii u dambeeyay ee Golaha Wadatashiga Qaran.

Kulankii 27-kii May ee Golaha ayaa lagu gaaray heshiisyo xasaasi ah oo keenay inuu qabsoomo kulanka wadatashi ee maanta lagu soo gaba-gabeeyay Muqdisho, kaasi oo madaxdii hore ay madaxda sare ee dalka kula wadaageen tallo soo jeedin ku aadan qodobada heshiiskaas.

Arrintan ayaa imaneysa xilli Villa Somalia ay shaacisay inay socdaan wada-hadalo hoose oo u dhaxeeya madaxda sare ee dalka iyo hoggaanka Puntland, si xa looga gaaro khilaafka siyaasadeed ee muddooyinkii dambe ka dhex aloosna.

Agaasimaha Guud ee Madaxtooyada Qaranka Xuseen Sheekh Maxamuud oo shaaciyay inuu socdo wada-hadalka hoose ee u dhaxeeya dowladda federaalka Soomaaliya iyo maamulka Puntland, ayaa sidoo kale guul ka rajeeyay wada-hadalladaasi.

“Puntland maqnaashaheeda sida dadkan loola tashanaayo ayaa diyaar loola yahay in loola tashado Soomaaliyana way isu baahan tahay, Puntland-na Soomaaliya ayay u baahan tahay, Soomaaliyana hadda ma awoodo in dowlad-goboleed ay gooni uga istaagto marka mabda’ guud waayay oo hoos imaanayo Soomaali Heshiis ah” ayuu yiri Xuseen.

Waxa uu intaas sii raaciyay “Wada-hadalka (DF & Puntland) waa furan yahay si hoose ayay hadda u socdaan, waxaan rajeynaa Insha Allah inay mira-dhasho oo la’isku yimaado oo tabashada laga wada-hadlo.”

Si kastaba, Maamulka Puntland oo khilaaf siyaasadeed uu kala dhaxeeyo Villa Somalia ayaa horay ugu dhawaaqday go’aanno culus oo ka dhan ah dowladda dhexe, taasi oo keentay inuu go’o xiriirkii Muqdisho iyo Garoowe.

The post Madaxdii hore oo walaac ka muujiyay maqnaashaha Puntland, dalabna u jeediyay Xasan appeared first on Caasimada Online.