Xasan oo beddelay dhaqan siyaasadeedkiisi, farriin culusna u diray xubnaha xisbigiisa ee…

[Deeq A.]

Muqdisho (Caasimada Online) – Sabtidii waxaa shaqada laga eryay Wasiirkii Maaliyadda ee dowladda federaalka ah, Dr Cilmi Maxamuud Nuur. Xil ka qaadistiisa waxaa miisaan gaar ah u yeelay inuu xubin muhiim ah ka ahaa xisbiga madaxweyne Xasan Sheekh ee la yiraahdo UPD.

Waxa uu ahaa qofka ugu muhiimsan uguna muddada fog ee reer Waqooyi ah ee Xasan Sheekh Maxamuud wax la dhistay.

Qaabka loo bixiyay ama xilka looga qaaday waxaa ku dhex jirta farriin gaar ah. Wasiirku waxa uu shaqada ka joojiyay agaasimaha dakhliyadda iyo xisaabiyaha guud, mushaarkii ayay dadka qaar kasoo daahay bishan, khilaafyo kalana waa jireen, laakiin dhamaan arrimahan waxay ahaayeen kuwa si hoose loo xalin karayay oo aan u baahneyn in fal-celintooda la gaarsiiyo heer wasiirka shaqada laga eryo.

Dadka ka faallooda siyaasadda Soomaaliya waxay leeyihiin sida loo maareeyay xaaladda Dr. Cilmi iyo qaabka loola dhaqmay shaqsi ahaan intuba waxay farriin taban u tahay dhamaan xubnaha xisbiga UPD, ee isku dayaya inay dadka ku harowsadaan inay madaxweyne Xasan Sheekh wax la leeyihiin ama ay xukunka dadka uga dhow yihiin.

Farriintan waxaa la yiraahda haddii aadan u shaqeyn sida aan rabo waxaa u baxeysa si aad rabin. Tallaabada laga qaaday Dr. Cilmi mid ka qaraar badan inay ku dhici karto xubnaha kale ee UPD ee xilligaan dowladda ku jira ayay tani calaamad u tahay ayay leeyihiin fallanqeeyayaashu.

Waa digniin aan la maldihin oo isla kooxda gudaheeda ku socota. In uu Dr. Cilmi gardarnaa iyo in laga gardarnaa waxaa ka muhiimsan in madaxweyne Xasan Sheekh u kala saaran tahay shaqada iyo kooxnimada.

In shaqada iyo kooxnimada la kala qaado waxay dadka qaar u arkaan caafimaad dowladeed. Madaxweyne Xasan Sheekh Maxamuud oo markii labaad fursad u helay inuu dalka xukumo, wuxuu u muuqda inuu beddelay dabeecad kamid ah dabeecadihii lagu yaqaanay gal xukunkiisi hore, taas oo aheyd in gar iyo gardaraba uu garab siiyo saaxiibadiis oo uu xukunka ku hayo.

Waxaa la xasuusta in xukuumad dhan uu Baarlamaankii 9-aad usoo diiday xubno madaxweynaha saaxiib la ahaa, madaxweynuhuna uu ku adkeysanayay inay xukuumadda kusii jiraan, laakiin markii dambe lagu qasbay in laga reebo liiska.

Hadda waxaa daawaneyna Xasan Sheekh cusub oo haddii ay kooxdiisa wax qaldaan ama u shaqeeyaan si ka duwan sida uu rabo deg deg uga saari kara nidaamka.

Tallaabadii laga qaadar wasiirkii Maaliyadda Dr. Cilmi Maxamuud Nuur waxay farriin taban oo cabsi ah u tahay dhamaan xubnaha xisbiga UPD ee xilalka haya oo laga yaabo inay isku dayaan ku tagri-fal awoodeed ama qaadashada go’aano shaqsi ah oo aan lala ogeyn, waxayna dadka si fudud u fahamsiisay qeyb kamid ah farqiga Xasan Sheekh tallinayay 2012 illaa 2017 iyo Xasan Sheekh xukunka haya maanta.

The post Xasan oo beddelay dhaqan siyaasadeedkiisi, farriin culusna u diray xubnaha xisbigiisa ee… appeared first on Caasimada Online.