Xisaabiyaha iyo agaasimaha dakhliga W/maaliyadda oo shaqo joojin lagu sameeyay

[Deeq A.]

Muqdisho (Caasimada Online) – Wasiirka Maaliyadda Soomaaliya Dr Cilmi Maxamuud Nuur ayaa shaqo joojin deg deg ah ku sameeyay Xisaabiyaha Guud iyo Agaasimaha Guud ee Dakhliga ee Wasaaradda Maaliyadda.

Shaqo ka joojinta labada masuul ayaa salka ku haysa amar diido, wada-shaqeyn la’aan iyo caqabad ay ku noqdeen hanaanka lagu maamulo qarash bixinta dowladda ee SFMIS, sida lagu yiri warqadda shaqada looga joojiyay.

“Xisaabiyaha Guud waxa uu si badheedh ah ugu sameeyey dib udhac sabab la’aan ah iyo is hortaag bixinta mushaharooyinka shaqaalaha iyo masuuliyiinta dowladda. Sidoo kale waxa uu si ula kac ah u damiyey system-kii SFMIS ee ay ku shaqaynayeen Waaxda Canshuuraha barrigu kana xidhay,” ayaa lagu yiri warqadda shaqada looga joojiyay Xisaabiyaha Guud, taas oo uu ku saxiixna Wasiir Cilmi Maxamuud Nuur.

Wasiirka Maaliyadda ayaa waxa uu faray Xisaabiyaha Guud in uusan soo xaadirin shaqada illaa inta shaqo ka joojintu ay dhaqan-gal tahay, wuxuuna si kumeel-gaar ah ugu magacaabay inuu shaqada sii hayo Xisaabiyaha Ku-xigeenka Mudane Cabdirisaaq Maxamed Abukar.

“Taliyaha Amniga ee Wasaaradda Maaliyadda waxaa lagu wargelinyaa in uusan sarkaalkaan u ogolaan inuu soo galo xarunta Wasaaradda Maaliyadda. Sidoo kale La-taliyaha Sharciga ee Wasaaradda waxaa la farayaa inuu baaris ku sameeyo falka sharci darrada ah oo uu ku kacay Xisaabiyaha Guud, uuna usoo diro warbixin Wasiirka muddo 10 maalmood gudahood ah.”

Wasiirka Maaliyadda ayaa sidoo kale waxa uu Waaxda Canshuuraha Berriga iyo Waaxda Canshuuraha Furdooyinka ee Wasaaradda Maaliyadda uu faray inay si toos ah u hoostagaan Agaasimaha Guud ee Wasaaradda Maaliyadda inta shaqo ka joojinta Agaasimaha Guud ee Dakhliga dhaqan-galka tahay.

“Agaasimaha Guud ee Dakhliga ayaa waxa uu si sifo badheedh ah uga horyimid amarka wasiirka isuna hortaagay wareegtada magacaabista ku meelgaadhka ah ee Agaasimaha Canshuuraha Berriga, taasi oo saameyn ku yeelatay awoodii dhaqaale ee dowladda,” ayaa lagu yiri qoraalka.

Tallaabadan uu qaaday Wasiirka Maaliyadda ayaa imaneysa xilli uu hakad galay bixinta lacagaha kaalmada deeq-bixiyeyaasha ku deeqeen ee qaar kamid ah loogu tala-galay in loo wareejiyo dowladda Soomaaliya iyo dowlad-goboleedyada.

Waxay sidoo kale kusoo aadeysa, iyada oo saraakiil sare oo ka tirsanaa Wasaaradda Maaliyadda loo xiray arrimo la xiriira musuq-maasuq, halka qaar kalena ay baxsad yihiin, sida uu shaaciyay Xafiiska Xeer-Ilaaliyaha Guud ee Qaranka.

The post Xisaabiyaha iyo agaasimaha dakhliga W/maaliyadda oo shaqo joojin lagu sameeyay appeared first on Caasimada Online.