Wasiirka Amniga Jubbaland oo Faahfaahin Ka Bixiyay Dagaal Ka Dhacay Jubbada Hoose

[Deeq A.]

Faahfaahinno dheeraad ah ayaa waxaa laga helayaa dagaal u dhaxeeyay Al-shabaab iyo ciidanka dowlad goboleedka Jubbaland oo ka dhacay deegaanka Girileey ee goblka Jubbada hoose.

Dagaalka ayaa yimid kadib markii ciidamada dowladda Kenya ee ka tirsan ATMIS ay isaga baxeen saldhiggaas, waxaana halkaas ku sugnaa kuwa Jubbaland, ka hor inta aysan weerar kusoo qaadin Al-shabaab.

Wasiirka wasaaradda amniga Jubbaland Yuusuf Cismaan Dhuumaal ayaa sheegay in weerarka ay iska caabiyeen, isaga oo ka saaray meesha inuu jiro khasaare soo gaaray dhankooda marka laga reebo dhaawaca hal askari.

Wasiirka oo hadalkiisa siiwato ayaa dhanka kale sheegay in ay kusii sugnaan doonaan saldhigga ay ka baxeen ciidanka dalka Kenya oo ku wehlinayay markii hore oo muddo ku sugnaa halkaas, iyaga oo taageerayay Daraawiishta.

Weerarka ka dhacay deegaankaan ayaa waxaa uu kusoo aadayaa iyadoo Al-shabaab dhowr jeer ay weerarro ka geysteen saldhigyo ay ku sugnaayeen ciidanka dalka Kenya iyo kuwa Jubbaland, waxaana bixitaankooda uu kusoo aadayaa xilli madaxweynaha Kenya uu sheegay in ay ku sii sugnaan doonaan Soomaaliya.

Goobjoog News

Source: goobjoog.com