Daawo: Odayaasha beesha Xawaadle oo ka jawaabay hadalkii kuwa beesha Abgaal

[Deeq A.]

Muqdisho (Caasimada Online) – Odayaasha dhaqanka beesha Xawaadle ayaa ka soo jawaabay eedeyntii kaga timid odayaasha dhaqanka beesha Abgaal oo sheegay in Xawaadle uu dhul boob ka wado xuduuda ay wadaagaan gobollada Hiiraan iyo Shabeellada Dhexe.

Odayaashaan oo maanta shir jaraa’id ku qabtay magaalada Muqdisho ayaa sheegay in dagaal aysan u qabin beesha Abgaal, isla markaana ay ku baaqayaan nabad iyo walaalnimo.

Sidoo kale odayaasha Xawaadle ee maanta hadlay waxay soo jeediyeen in guddi ka socda labada dhaqan ee beelaha Abgaal iyo Xawaadle loo diro xuduuda uu khilaafkaasi ka taagan yahay.

Odayaasha Xawaadle waxay balan qaadeen in natiijada baaritaanka la sameeyo uu dhankooda ka dhaqan geli doono oo dib ay ugu soo celi doonaan walaalahood Abgaal wixii ay sitaan.

“Walaalaheen waxaan ka wadno waa ogonahay, laakiin hadda waxaan qabnaa in waxaba aanaa u dhibin Abgaal, hadalkii maalin dhaweeto ka soo yeeray wuxuu ahaa mid colaadeed, nabad ayaan ku baaqeynaa, anagu dhihi meyno saacado kooban ayaan u qabaneynaa Abgaal,” ayuu yiri mid ka mid ah odayaasha u hadlay beesha Xawaadle.

Oday kale ayaa yiri, “Abgaal sidii safaaradii Ruushka ayey 48 saacadood noo qabteen, hadana waxaan aaminsan nahay in dhul nooga maqan yahay walaalaheen, anagu waxaan diyaar u nahay inaan gogol dhigno meesha xiisadaasi ay ka taagan tahay.”

Odayaasha Xawaadle ayaa beelaha kale ee Mudullood iyo guud ahaan Mogadishu Clan waxay ka codsadeen in la kala qabto walaalahood Abgaal oo iclaaminaya dagaal sokeeye, sida ay hadalka u dhigeen, “Waxaan soo jeedineynaa in dhaqanka iyo siyaasadda aan la isku milin oo dhaqanka labada beelood loo daayo xalka arrintaan,” ayaa lagu yiri bayaan ay soo saareen.

Madaxweynihii hore ee Soomaaliya Shariif Sheekh Axmed iyo Ergeyga gaarka ah ee madaxweynaha u qaabilsan Xasillinta iyo Ilaalinta Arrimaha Rayidka ee goobaha dagaallada Maxamed Cabdi Waare ayaa maanta ka hadlay xiisadda u dhaxeysa beelaha Abgaal iyo Xawaadle, kadib shir jaraa’id oo Muqdisho ay ku qabteen.

Labada masuul oo wax aan la aqbali karin ku tilmaamay colaadaan ayaa sheegay in arrintaan ay tahay caqabad lagu fashilinayo dagaalka Al-Shabaab, “Dagaal nagula farad yeelay oo aan ka baaqsan karin ayaa nagu furan oo waa dagaalka Al-Shabaab. Mid kuwa meesha jooga iyo kuwa kale aan kala kaseyn oo in uu ku dilo kaliya loo soo diyaariyay oo waxba ku weydiineyn kaas ayaa jooga,” ayuu yiri Sheekh Shariif.

The post Daawo: Odayaasha beesha Xawaadle oo ka jawaabay hadalkii kuwa beesha Abgaal appeared first on Caasimada Online.