Villa Somalia oo dadaal xooggan gelinaysa in ay wada-hadal la furto xukuumadda Puntland

[Deeq A.]

Dowladda Federaalka Soomaaliya ayaa dadaal xooggan ku bixinaysa in ay si deg deg ah wada-hadal ula furto xukuumadda Puntland, sida ay noo xaqiijiyeen dad lagu kalsoon yahay warkooda.

Villa Somalia ayaa si weyn uga walaacsan hadal dhawaan ka soo yeeray wasiirka Maaliyadda Puntland, kaas oo ahaa in la hakiyo hannaanka deyn cafinta dalka, inta laga heshiinayo khilaafaadka siyaasadeed.

Madaxweyne Xasan Sheekh iyo Ra’iisul wasaare Xamse oo ka walaacsan hadalka wasiir Dhabancad ayaa bilaabay in ay xiriir la sameeyaan dhinacyo kala duwan oo saamayn ku leh siyaasadda Puntland, si ay ugu kala dab-qaadan Puntland iyo Villa Somalia.

Madaxda dowladda Soomaaliya ayaa raadinaya in uu si dhakhso ah u furmo wada-hadalka labada dhinac, si heshiis siyaasadeed looga gaaro khilaafka Puntland iyo Villa Somalia, islamarkaana looga baaqsado in uu fashilmo barnaamijka deyn cafinta dalka.

Dhinaca kale, Puntland ayaa marar kala duwan sheegtay in ay diyaar u tahay wada-hadal lagu dhammeeyo khilaafka taagan, waxaase la rumaysan yahay in xiriirkoodu uu heerkii ugu liitay joogo, kaas oo saamayn ku yeeshay wada-shaqayntii labada dhinac.

PUNTLAND POST

The post Villa Somalia oo dadaal xooggan gelinaysa in ay wada-hadal la furto xukuumadda Puntland appeared first on Puntland Post.