Dhageyso: Taliyaha Macawiisley oo xog xasaasi ah ka bixiyey weerarkii Daaru-nicma

[Deeq A.]

Daarunicma (Caasimada Online) – Taliyaha ciidanka Macawiisley ee ka dagaalama degaanka Daarunicma Cabdi Taakow Qodaxow  ayaa faahfaahin ka bixiyey sida ay kooxda Al-Shabaab ugu suurta gashay inay saakay qabsadaan degaankaas.

Cabdi oo la hadla Idaacadda VOA ayaa sheegay in xalay xiligii dambe ay ka war heleen in kooxda Al-Shabaab ay duulaan ku soo tahay deegaanka, isla markaana ay sameeyeen xeelad dagaal.

Wuxuu sheegay inay isaga baxeen deegaanka oo hal qof uusan ka harin, taas oo sababtay in kooxdii ay si nabad ah ku soo galaan deegaanka Daarunicma oo muddooyinkii lasoo dhaafay ay maamulayeen ciidanka Macawiisley.

Cabdi Taakow wuxuu sheegay in khadaaraha ugu badan ee weerarkaas ka dhashay uu soo gaaray Masjid weyn oo deegaanka ku yaalla, kaas oo kooxdu ay ku dhufatay gaari qarax ah.

Wax dhimasho ama dhaawac ah kama dhalan weerarkaas, sida uu sheegay Taliye Cabdi Taakow, waxayna daqiiqado gudahood Al-Shabaab ku baneeyeen deegaankaas ay dagaal la’aanta kula wareegeen.

“Xalay saqdii dhexe ayaan dareenay culeyska kooxda, kadibna waxay sameynay dib u gurasho, waxay soo galeen afartii habeenimo, waxayna gaari qarax ah ku dhufteen Masaajidka, kadib hal qof waa ka waayeen deegaanka, waana isaga carareen oo 10 daqiiqo ma joogin, sababtoo ah waa cabsadeen oo xeelad dagaal inaan magaalada uga baxnay waa dareemeen, ayuu yiri Taliyaha ciidanka Macawiisley ee aagga degmada Ruun-nirgood.

Maanta waxaa deegaanka Daarunicma dib ula wareegay ciidanka macawiisley ee markii hore baneeyey deegaanka iyo kuwa xoogga dalka oo gurmad ugu tegay, waxayna gelinkii dambe ee maanta xaaladu ku soo laabatay si caadi ah.

Taliye Cabdi Taakow waxaa la weydiiyey sababta aysan deegaankaas u joogin ciidan ka tirsan xoogga dalka, wuxuuna sheegay in isbedelka saraakiisha sare ee taliska xoogga iyo munaasabadaha xorriyada iyo ciida ay saameeyeen dhaqdhaqaaqii ciidan ee aagaas ay ka waday dowladdu.

The post Dhageyso: Taliyaha Macawiisley oo xog xasaasi ah ka bixiyey weerarkii Daaru-nicma appeared first on Caasimada Online.