Soomaaliya ‘oo ogolaatay’ inay ka qeyb-gasho kulanka Madasha Negev ee Israel

[Deeq A.]

Tel Aviv (Caasimada Online) – Soomaaliya iyo Comoros ayaa ogolaaday inay saraakiil sare oo korjoogto ah u diraan shirka heer wasiir ee Madasha Negev, oo ah koox ay ku jiraan Mareykanka, Israel, Masar, Imaaraadka Carabta, Bahrain iyo Morocco, waxaa sidaas warbaahinta Axios ee Mareykanka u sheegay laba sarkaal oo Israeli ah.

Soomaaliya iyo Comoros oo ah laba dal oo Islaam ah wax xiriir diblomaasi oo rasmi ah lama lahan Israel.

Saraakiisha labada dal ayaa wada-hadallo qarsoodi ah la lahaa Israel muddo sanado ah, waxayna dhowaan si qarsoodi ah u booqdeen Israel, sida ay sheegeen saraakiisha Israel ee la hadlay Axios.

Ka qeybgalkooda kulanka ayaa noqon karta tallaabo weyn oo loo qaaday hanaan ay labada dal xiriir diblomaasi kula yeelanayaan Israel.

Madasha Negev waxaa la aasay March 2022, kadib kulan aan caadi aheyn oo ay ka qeyb-galeen xoghayaha arrimaha dibedda Mareykanka Antony Blinken iyo wasiirada arrimaha dibedda Israel, Masar, Imaaraadka Carabta, Bahrain iyo Morocco.

Aas-aadka madasha ayaa looga dan leeyahay inay dalalka gobolka iskaashi ka yeeshaan arrimaha caafimaadka, dhaqaalaha, isbeddelka cimillada, biyaha iyo ammaanka.

Kulankii labaad ee heer wasiir ee Madasha Negev ayaa la qorsheeyey bishii March ee lasoo dhaafay, hase yeeshee waxaa dib loo dhigay dhowr jeer, kadib markii xubnaha Carabta ay walaac ka muujiyeen inay si toos ah ula macaamilaan dowladda garabka midig ee fog ee Israel.

Waxaa hadda la filayaa in kulanka uu dhaco xagaagan.

Kahor dib u dhigista kulankii March, Israel ayaa soo jeedisay in Soomaaliya iyo Comoros ay kulanka uga qeyb-galaan hab korjoogto ahaan ah, wayna aqbaleen labada dal, sida ay saraakiisha Israel u sheegeen Axios.

Isaga oo u warramayey weriyayaasha Axaddii, wasiirka arrimaha dibedda Israel Eli Cohen ayaa sheegay “laba ama saddex dal oo aan xiriir diblomaasi la lahayn Israel ayaa ka qeyb-geli doona kulanka.”

Waxa uu intaas ku daray in Israel ay weli rumeysan yahay “inay ka qeyb-geli doonaan kulamada mustaqbalka, ayna noqon doonto tallaabo horey loogu qaaday xiriir rasmi ah.” 

Safaaradda Soomaaliya ee Washington iyo howlgalka Comoros ee QM ayaan ka jawaabin codsi falcelin oo loo diray.

The post Soomaaliya ‘oo ogolaatay’ inay ka qeyb-gasho kulanka Madasha Negev ee Israel appeared first on Caasimada Online.