Fal-celin xooggan oo ka dhalatay tallaabo ay qaaday maxkamadda ciidamada

[Deeq A.]

Muqdisho (Caasimada Online) – Fal-celin xooggan ayaa ka dhalatay xukunno ay maanta maxkamadda darajada koowaad ee ciidamada qalabka ku ridday laba askari oo faafiyay muuqaal si weyn u qabsaday baraha bulshada, kaas oo ku saabsanaa jirdil loo geystay wiil dhalinyaro ah.

Muuqaalkaas ayaa laga dheehan karayay askar jirdil ka baxsan bini’aadanimada u gaysanaya askari hore oo baahiyaha gaarka ah qabay oo adeeg u doontay xarunta Taraafikada ee magaalada Muqdisho.

Xukunka labada askari ee faafiyay muuqaalkaas ayaa qeyb ka ahaa xukunno ay maanta maxkamadda ciidamada ku riday askar lagu helay falka jirdilka ee ka dhacay xarunta Taraafikada ee magaalada Muqdisho.

Axmed Xasan Cadaawe oo ahaa madaxa Camerada CCTV, ayaa isna lagu helay in muuqaalka uu bixiyay, islamarkaana uu la wadaagay Cabdullaahi Abuukar Cariif oo ah ninka kusii baahiyay baraha ay ku wada xiriirto bulshada ee Internet-ka.

Labadan nin ayaa sidoo kale lagu xukumay min laba sano oo xabsi ciidan ah iyo sidoo kale feer celin.

“Waxa ay awoodi kareen in ay la wadaagaan muuqaalka hay’adaha ku shaqada leh CID iyo Xeer Ilaalinta Ciidamada balse badalkeed waxa ay doorteen ceebaynta Qaybta ilaalada Nabad Galyada Waddooyinka” ayaa lagu yiri war-saxaafadeed kasoo baxay maxkamadda.

Haddaba, Sidee looga fal-celiyay arrintaan?

Cumar Naaji: “Maxkamadu waxay dhiiri-galinaysaa tacadiyada ka dhaca xarumaha dowlada in aan lasoo bandhigin oo dhibkaas iyo kuwa ka daranba la qariyo Ilaahay ayaa noo maqan.”

Shariif Axmed Nuur ayaa isna yiri “Labada askari waxa ay aheyd in la dalacsiiyo maaheyn in loo qaato fadeexeyn waana mudnaayeenba in bulshadu aragto waxa halkaas ka jira.”

“Dalkeena wali garsoor iyo cadaalad kama jirto waa uun iska awood sheegasho, kii danbiga galay iyo kuwii inuu danbi galay shacabka iyo maxkamada tusay 3 sano iyo 2 sano lagu kala xukumay!!. Qof Soomaali ah sidee ugu dhiiran karaa danbi uu arkay inuu soo sheego?,” ayuu yiri Liibaan oo kamid ah dadka ka fal-celiyay xukunka maxkamadda.

Warda Cabdiraxmaan Caseyr ayaa tiri: “Kuwa muuqaalada baahiyey abaal marin ayey mudnaayeen sidee ila tahay laakiin waa ka xumahay.”

Aadan Bulaale ayaa isna yiri: “War dulmi badnidiinaa nimanka muuqaalka baahiyay daaya. Ilaahey ma taqaaniin miyaa.”

“Muuqaal aad faafisay 2 sano oo xabsi ah ha kuu horseedo waa cashar nololeeed,” ayuu yiri Muumin Raage Axmed.

Maxamed Cali Diiriye oo kamid ah dadka ka fal-celiyay arrintaan ayaa yiri “Macnaheedu waxay tahay haddaanu muqaalkaasi dibadda usoo bixi lahayn muwaadinkaasi caddaalad ma heleen!.”

Cabaas Sheekh Cismaan: “Cadaalad ma ahan xukunkaan fal dambiyeed badan aya ka jira xarumaha dowlada yaa la sheegin miyaa laga wadaa teeda kale Social Media-ha kiiska la keeno ayaa wax laga qabtaa, midaas ayaana ku riixday inay halkaas kuso gudbiyaan dhacdada.”

Suldaan Samawade Suldaan ayaa isna yiri “Waxaa hubaa hadii lala wadaagi lahaa hay’adaha xeer ilaalinta in aan waxba laga soo qaadeen oo horay looga socon lahaa, maxaa ku jaban hadii bulshada lala wadaago mise in la qariyaa rabteen oo meesha lagu baabiiyo markii shacabkii ay kaceen ayaa xukunka rideen.”

“Ninkii ninka naafada ahaa dilayay iyo nimankii bulshada tusay isku xukun miyaa laga dhigay allow hana badin cadaalada maxkamadahaas oo aan wax iska badalin,” ayuu yiri Cabdinaasir Maxamed Jimcaale.

Cabdullaahi Saciid: “Ninka CCTV hadii uusan samayn lahayn arinkaan ma umalaynayo in uu cadaalad heli lahaa ninkaas curyanka ahaa ee la dulmiyey.”

“Qofkii soo bandhigo tacadi iyo dhibaato ka jirto xafiis dowladdeed waa la xakumaa, halkii laga abaalmarin lahaa oo kuwa falkaas gurucan geystana laga ciqaabi la haay. Tani ma ahan kaliya xukun lagu riday labo shaqsi ee waa fariin ku socota shacabka oo leh ‘war afaaraheena ka baxa haddii kale waa la idin maxkamadeynaa,” ayuu yiri Yaasir Saciid.

The post Fal-celin xooggan oo ka dhalatay tallaabo ay qaaday maxkamadda ciidamada appeared first on Caasimada Online.