Xiisadda GEDO oo ka dartay iyo Ugaas Maxamed Ugaas Xaashi ‘oo ka badbaaday’ dil

[Deeq A.]

Muqdisho (Caasimada Online) – Ugaas Maxamed Ugaas Xaashi Ugaas Xirsi ayaa ka badbaaday isku-dey dil, sida uu shaaciyay Xildhibaan Cabdullahi Aadan Kullane oo ka tirsan golaha shacabka, kuna abtirsada beesha Sade ee ugaaska uu kasoo jeedo.

“Waxaan bulshada Soomaaliyeed u cadaynayaa in Ugaas Maxamed uu dirqi kaga badbaaday shirqool iyo dhagar la doonayey in lagu khaarajiyo,” ayuu yiri Xildhibaan Kullane.

Xildhibaanka ayaa waxa uu ku eedeeyay isku-deygaan dil ee Ugaaska uu ka badbaaday inuu soo maleegay madaxweynaha dowlad-goboleedka Jubbaland, Axmed Maxamed Islaam (Axmed Madoobe).

Waxa uu sheegay in hadda wixii ka dambeeya in wax walba oo soo gaara Ugaas Maxamed Ugaas Xaashi Ugaas Xirsi uu masuuliyadeeda qaadi doono ra’iisul wasaare Xamza Cabdi Barre.

“Laga bilaabo saacadaas, weerarkaas iyo masuuliyadiisa iyo weliba xariiq iyo xagtin kasta oo soo gaadha Ugaas Mohamed Ugaas Xaashi Ugaas Xirsi, waxa qaadi doona Ra’iisal Wasaare Xamse Cabdi Bare, maadaama isagu yahay madaxa ugu sarreeya ee Xukuumada Federalka Soomaaliya,:

Xildhibaan Kullane ayaa waxa uu ra’iisul wasaare Xamza ku eedeeyay inuu hormuud u yahay xasaradda ka taagan goolka Gedo, Jubbaland-na uu horay ceel ugu riday, sida uu ku yiri qoraalka uu soo saaray.

“Iskudayga Dilka Ugaasku waa gal waxshinimo, kaas oo gebi ahaanba kasoo horjeeda dhaqankeena suuban ee Islaamnimo iyo keena Soomaaliyeed, waxaana maqdac ah oo xariman in lagu xad gudbo birmageydada iyo muqadasaadka dhaqan ee umadi leedahay.”

Sidoo kale wuxuu ugu baaqay Villa Soomaaliya in aanay madaxweyne Axmed Madoobe ku kaalmayn xaaladan xun ee ka taagan Gedo oo uu sheegay inay keeni doonto cawaaqib kasii xun midda hadda taagan.

Ugu dambayntiina waxa uu shacabka iyo dadweynaha reer Gedo ugu baaqay ilaalinta Ugaaskooda, “ilaashada sharafkiina oo ha ogolaanina in cirdigiina iyo cimaamadiina lagu xad gudbo.”

Cabdullahi Kulane oo kursi Xildhibaan ka soo qaatay Galmudug intii ay socotay doorashadii Baarlamaanka ayaa kamid ahaa saraakiishii NISA ee madaxweyne Farmaajo u adeegsaday in gobolka Gedo ay ka soo jaran Jubbaland-ta uu maamulo Axmed Madoobe.

Madaxweynaha Jubbaland Axmed Madoobe ayaa dhawaan maamul cusub u magacaabay gobolka Gedo, taasi oo hadda soo cusbooneysiisay hadal-heynta jahwareerka maamul ee sanadihii lasoo dhaafay ka jiray gobolkaas.

The post Xiisadda GEDO oo ka dartay iyo Ugaas Maxamed Ugaas Xaashi ‘oo ka badbaaday’ dil appeared first on Caasimada Online.