Daawo: DF oo iska fogeysay eedeyn duulimaad oo kaga timid Soomaalida degan UK

[Deeq A.]

Muqdisho (Caasimada Online) – Hadal-heyn badan ayaa ka dhalatay qoraal lagu daabacay baraha bulshada, gaar ahaan Twitter oo ku saabsanaa cabasho ay qabeen qoysas Soomaaliyeed oo doonaya inay Soomaaliya u soo safraan.

Qoysaaskaas ayaa diyaaradda Qatar Airways waydiisay warqad ka socota Safaaradda Soomaaliya ee Ingiriiska, waxaana warqadaas ka jawaabtay dawladda Soomaaliya.

Qoraal ka soo baxay safaaradda Soomaalida ee dalka Ingiriiska ayaa lagu yiri, “Safaaradda Soomaaliya ee London wax shardi ah oo la xariira warqad laga doonaya musaafiriinta oo ay rabto ma jirto.”

Dhanka kale, hey’adda Socdaalka iyo Jinsiyadaha Soomaaliya ayaa soo saartay war-saxafadeed ay ku cadeysay in amar dhankooda ka yimid oo shuruudo la kordhiyay ah uusan jirin.

“Dhamaan shirkadaha diyaaradaha ee sameeya duulimaadyada caalamiga ah ee ka yimaada Yurub iyo Maraykanka waxaa la faray in ay qaadaan xannibaada,” ayaa lagu yiri war-saxaafadeeda hey’adda Socdaalka iyo Jinsiyadaha Soomaaliya.

Dhankeeda shirkadda duulimaadyada ee Qatar Airways kama soo bixin wax war ah oo ay ku faahfaahineyso arrintaan sababtay inay ka soo jawaabaan safaaradda iyo hey’adda Socdaalka iyo Jinsiyadaha Soomaaliya.

Safiirka Soomaaliya u fadhiya UK Cabdulqaadir Axmed Kheyr ayaa ka hadlay arrintaan isagoo sheegay in shirkadaha diyaaradaha ay la yimaadeen shuruud ah inay dal ku gal la yimaadaan dhalinyarada Soomaaliyeed ee dalkooda u safraya.

“Arintaasi waxay ku egtahay shirkadaha diyaaradaha oo dowladda ama safaaradaha kama soo bixin amarkaasi, waxayna saameysay Yurub oo dhan,” ayuu yiri Danjire Cabdulqaadir Axmed Kheyr.

Wuxuu sheegay in arrintaas ay safaaraddu kala hadashay shirkadaha duulimaadyada, isla markaana ugu dambeyn xal lagu gaaray in safaaraddu ay bixiso warqad cadeyneysa in dhalinyarada ku soo laabaneysa dalkooda ay dhalashadoodu sax tahay.

Hoos ka daawo wareysi uu safiirku siiyey Universal TV

The post Daawo: DF oo iska fogeysay eedeyn duulimaad oo kaga timid Soomaalida degan UK appeared first on Caasimada Online.