Dowladda Federaalka Soomaaliya, IMF iyo Bangiga Adduunka oo Shir Uga Furmay Magaalada Nairobi

Deeq A. · June 12, 2023

Waxaa maanta magaalada Nairobi ee dalka Kenya shir uga furmay Dowladda Federaalka Soomaaliya, Hey’adda Lacagta Adduunka ee IMF iyo Bangiga Adduunka kaas oo ku saabsan barnaamijka ECF ee dib-u-habeynta hannaanka Maaliyadda iyo Geedi socodka Deyn Cafinta Soomaaliya.

Shirkaan oo 4 maalin socon doono ayaa diirada ku saari doonaa arrimaha dakhliga gudaha, nidaamka Maamulka Guud ee Maaliyadda (PFM) Maamul wanaagga iyo hannaanka dib-u-habeynta Maaliyadda.

Wasiirka Maaliyadda Soomaaliya Dr. Cilmi Maxamuud Nuur oo shirkaan si ramsi ah u furay ayaa sheegay in looga hadli doono horumarinta sare u qaadidda dalhliga gudaha, hirgalinta nidaamka Maamulka Maaliyadda Guud iyo dib-u-habeynta kaabayaasha dhaqaalaha dalka.

Wasiirka Maaliyadda Soomaaliya Dr. Cilmi M. Nuur ayaa sheegay in ay qaadayaan talaabo dowladeed oo loo dhan yahay si loogu guuleysto fulinta qorshayaasha horumarineed ee dib-u-habeynta Maaliyadda Soomaaliya iyo dhameystirka Barnaamijka Deyn Cafinta Soomaaliya

Dowladda Federaalka Soomaaliya oo kaashaneysa Hey’addaha dhaqaalaha Adduunka ee ka taageera arrimaha horumarinta dhaqaalaha iyo hannaanka Dib-u-habeynta Maaliyadda ayaa dadaal xooggan ugu jirta dhamaystirka sidii Soomaaliya looga cafin lahaa deymaha faraha badan ee lagu leeyahay oo ku dhaw $1 Bilyan oo Dollarka Mareykanka ah.