Madaxweynaha Ukraine oo xaqiijiyay in uu bilowday duulaan ka dhan ah Ruushka

[Deeq A.]

Kyiv (Caasimada Online) – Madaxweynaha Ukraine Volodymyr Zelensky ayaa u muuqda inuu xaqiijinayo in dalkiisa uu bilaabay duulaanka ka dhanka ah Ruushka ee mudada dheer la sugayay.

“Weerar iyo isdifaac ayaa dhacaya” ayuu yiri maanta, laakiin waxa uu intaas ku daray in aanu si faahfaahsan uga hadli doonin heerka uu marayo ama uu sheegi doono weerarka rogaal celiska ah.

Hadalkaan ayaa yimid kadib markii ay sii kordheen dagaallada ka socda koonfurta iyo bariga dalka Ukraine.

Sidoo kale waxaa sii kordhaya qiyaasaha ku saabsan horumarka laga filayo in Ruushka dib loo riixo oo looga tag roonaado dagaalkaan.

Ciidamada Ukraine ayaa lagu soo waramayaa in ay u soo dhaqaaqeen dhanka bari ee u dhow Bakhmut iyo koonfurta meel u dhow Zaporizhzhia.

Sidoo kale waxaa la sheegay in ay weerar duqeyn ah oo riddo dheer ay ku qaadeen bartilmaameedyada ugu muhiimsan ee ciidamada Ruushka.

Hase yeeshee in la qiimeeyo xaqiiqada ka jirta jiidda hore ee dagaalka ayaa adag, iyadoo labada dhinac ee dagaallamaya ay soo bandhigayaan warar iska soo horjeeda.

Madaxweynaha Ruushka Vladimir Putin ayaa ku sheegay wareysi muuqaal ah oo la faafiyay Jimcihii in ciidamada Ukraine ay xaqiiqdii bilaabeen duulaankooda.

Putin ayaa ku faanay in ciidamada Ukraine ay ku fashilmeen isku daygii hore oo ay sameeyeen, isla markaana ay kala kulmeen khasaare xooggan.

The post Madaxweynaha Ukraine oo xaqiijiyay in uu bilowday duulaan ka dhan ah Ruushka appeared first on Caasimada Online.