Xildhibaanadii saaxiibka la ahaa Xasan oo diiday muddo kororsiga + Magacyada

[Deeq A.]

Muqdisho (Caasimada Online) – Xildhibaanada Golaha Shacabka Soomaaliya ayaa maanta dood ka yeeshay mooshinka muddo kordhinta madaxweynaha iyo labada aqal ee baarlamaanka oo la hor geeyey golaha.

Kulanka oo ahaa mid xasaasi ah oo si weyna loo sugayey ayaa waxaa dooddo kala duwan ka dhiibtay qaar kamid ah xildhibaanada golaha shacabka, waxayna u babaayeen kuwo diiday muddo kororsiga.

Xildhibaano ka tirsan xisbiga madaxweynaha iyo kuwo la shaqeeya oo saaxiib la ah madaxda dowladda federaalka ayaa qeyb ka ah xubnaha sida adag u diiday in lagu dhaqaaqo muddo kororsi.

Xildhibaan Cabdiraxmaan Odawaa oo ka mid ah garbaha Madaxweyne Xasan Sheekh, xildhibaan Cabdiraxmaan Cabdishakuur oo madaxweynaha wakiil uga ah arrimaha bini’aadanimada iyo xubno kale oo muhiim ah ayaa maanta si cad u diiday in baarlamaanka iyo madaxtooyada loo sameeyo muddo kordhin hal sano ah.

Xildhibaan Cabdiraxmaan Cabdishakuur ayaa soo jeediyay in la laallo mooshinka maanta la hor geeyey golaha, isagoo sheegay inuu wiiqayo dagaalka ay dowladda iyo dadka Soomaaliyeed kula jiraan Al-Shabaab.

“In muddo kordhin la sameysto dhibaatooyin badan ayaa naga soo maray, halis waxaa ku galay Madaxweynaha xafiiska fadhiya, nafteena ayaan ku siganay inaan ku weyno,” ayuu maanta golaha ka yiri Xildhibaan Cabdiraxman Cabdishakuur Warsame.

Xildhibaano ay ku jiraan Cabdiraxmaan Cagaweyne, Cabdifitaax Qaasim iyo Khadiija Diiriye ayaa ayaguna ku dooday in mooshinkaan uu muhiim u yahay qorshaha dalka lagu gaarsiinayo doorasho qof iyo cod ah.

Dooddan xasaasiga ah ee dhex taalla Baarlamaanka ayaa soo bilaabatay bishii Febraayo ee sanadkan, markaas oo loo xil-saaray guddi uu horkacayo xildhibaan Mahdi Guuleed, guddigaas ayaa maanta golaha ku soo celiyey mooshinkaas oo ay ku saxiixan yihiin in ka badan 90 xildhibaan.

Xildhibaan Cabdirashiid Xidig ayaa soo jeediyey in mooshinkaan la aqbalo, laakiin lagu cadeeyo in muddo xileedka shanta sano noqonaya uu bilowdo markii lasoo doorto madaxweynaha iyo baarlamaanka bedelaya kan hadda jira.

Guddoomiye Abshirow oo maanta shir guddoominayey kulanka ayaa soo xiray dooda golaha wuxuuna yiri, “Mooshinkaan xildhibaanada diiday iyo kuwa taageeray waxay toos ula kulmi karaan guddiga loo xil-saaray arrintaan, iyagoo ku biirinaya talooyinkooda.”

Xildhibaan Cabdiraxmaan Odawaa oo saaxiib dhow la ah Madaxweyne Xasan Sheekh ayaa yiri, “Hal sano oo aan ku darsano yaanaan ku fekerine aan xoogga saarno inaan wax muuqda qabano seddaxda sano ee noo hartay.”

Xildhibaan Cali Saciid Fiqi, guddoomiyihii hore ee baarlamaanka Koonfur Galbeed ayaa soo jeediyey inaan lagu mashquulin muddo kororsi ee awooda la isugu geeyo sidii dalka looga qaban lahaa doorasho qof iyo cod ah.

Xildhibaan Xasan Firinbi ayaa ka mid ahaa xildhibaanadii maanta sida adag u diiday muddo kororsiga “Mooshinkaan wax ka badalka iyo kabista dastuurka lagu sheegay ma ahan mid sharci ah, mana aqbali karno muddo kororsi iyo jaha wareer dambe,” ayuu yiri Xildhibaan Xasan Yare.

The post Xildhibaanadii saaxiibka la ahaa Xasan oo diiday muddo kororsiga + Magacyada appeared first on Caasimada Online.