Muqdisho: Nin iska dhigay ‘askari’ kadibna geystay afduub iyo kufsi oo lasoo qabtay

[Deeq A.]

Muqdisho (Caasimada Online) – Xeer-ilaaliyaha Guud ee Qaranka, Dr. Saleebaan Maxamuud Maxamuud ayaa faahfaahin ka bixiyay kiis xasaasi ah oo loo haysto nin ku eedeysan inuu iska dhigay inuu ka tirsan yahay hay’adaha amniga, kadibna geystay xad-gudub, sida kufsi iyo afduub carruur, kaas oo ay dhowaan gacanta kusoo dhigeen ciidanka.

Qoraal kasoo baxay xafiiska Xeer-ilaaliyaha ayaa waxaa lagu sheegay in eedeysanaha haatan loo gudbiyay Maxkamadda Gobolka Banaadir, si looga qaado tallaabo adag.

Xeer -ilaalintu ma shaacin magaca shaqsigan, balse waxa ay sheegtay inuu iska dhigay askari, kadibna uu soo xirtay dharka ciidanka, sidoo kalena uu qaatay hub sharci darro ah.

Sidoo kale Xeer-ilaalinta ayaa ninkan ku eedeysay inuu sharaf dilayay magaca hay’adaha amniga, isla-markaana uu khal-khalgelin ku hayay amniga guud ee magaalada Muqdisho.

“Xafiiska Xeer-ilaaliya Guud ee Qaranka, gaar ahaan waaxada denbiyada carruurta iyo haweenka ayaa Maxkamadda Gobolka Banaadir u gudbiyey eeed waafaqsan qodobka. 71-aad ee XHCS, loona haysto eedeysane iska dhigay inuu ka tirsanyahay hay’adaha amaanka isaga oo soo xirtay darayska ciidanka, qaatayne hub sharci darro ah, si uu uga gaaro danihiisa gurracan, una sharaf dilo ciidanka amaanka,” ayuu lagu yiri warka qoraalka ah.

Sidoo kale Xafiiska Xeer-ilaaliyaha Guud ee Qaranka ayaa ka dalbaday Maxkamadda Gobolka Banaadir inay soo mudeyso dhageysiga dacwadda loo haysto eedeysanaha.

“Eedeysanahaan oo ku kacay falal lid ku ah karaamada iyo sharafka carruurta iyo haweenka Soomaaliyeed, sida kufsi, afduub iyo khal-khalgelin amni ayaa wuxuu xafiisku waxa uu maxkamadda ka codsaday in lasoo muddeeyo dhageysiga maxkamadayntiisa,” ayaa mar kale lagu warqadda kasoo baxday Xafiiska Xeer-ilaaliyaha Guud ee Qaranka.

Ugu dambeyn Xeer-ilaaliyaha Guud Qaranka ayaa digniin culus kasoo saaray falalka gurraxan ee noocaan oo kale ah, isaga oo sheegay inay jiraan shaqsiyaad ku howlan falal abaabulan oo ka dhan ah carruurta iyo haweenka, laguna sharaf dilayo dowladda dhexe.

The post Muqdisho: Nin iska dhigay ‘askari’ kadibna geystay afduub iyo kufsi oo lasoo qabtay  appeared first on Caasimada Online.