Howlgalka Midowga Afrika ee Soomaaliya oo Ka Walaacsan Maalgalin La’aan

[Deeq A.]

Hawlgalka Nabad ilaalinta Midowga Afrika ee Soomaaliya ee (ATMIS) ayaa waxaa soo food saartay cabsi hor leh oo laga qabo in ay dib ugu dhacaan halbeegyada ay beesha caalamku dib u cusboonaysiisay joogitaankooda Soomaaliya, xilli la filaayo in 2024, December askariga ugu dambeeyo dalka isaga baxo sida dowladdu sheegtay.

Todobaadkan, Golaha Nabadda iyo Ammaanka ee Midowga Afrika (AUPSC) ayaa sheegay in howlgalka ATMIS uu kaalin weyn ka qaatay weerarrada ka dhanka ah kooxda Alshabaab, haddana ay jiraan tillaabooyin laga yaabo inay dib uga dhacaan qorshaha  ATMIS, kuwaas oo dhowaan laga soo bedelay howlgalka Afrika ee AMISOM.

Xubnaha gudiga amniga ee ka kooban 15-ka xubnood ee AU-da, oo wax ka qabta dhibaatooyinka nabadda iyo amniga ee qaaradda, ayaa sheegay in dhaqaale yari ay u badan tahay in ay cunaan qorshaha Howlgalka ATMIS, oo ah arrin khatar ku ah ciidamada amniga Soomaaliya, kuwaas oo kaalin muhiim ah ka jira amniga dalka xilligaan.

Shirkii Midowga Afrika ee sanadkaan magaalada Addis Ababa ayaa lagu sheegay qatarka jirta, walow ay guddiga amniga Midowga Afrika   sheegeen inay weydiisanayaan mar kale, Golaha Ammaanka ee Qaramada Midoobay inuu qabto kulan gaar ah oo ku saabsan maalgelinta loogu talagalay ATMIS, kaas oo aan weli la fududayn.

Midowga Afrika ayaa waxaa lagu wadaa in qorshaha nabad ilaalinta ee Soomaaliya uu soo idlaado sanadka 2024 dabayaaqadiisa, waxaana xilligaan walaaca uu kusoo aadayaa xilli dowladda ay ku jirto dagaalka Al-shabaab oo ka socda gobollada dalka intooda badan, waxaana Al-shabaab muddadaas laga saaray deegaanno dhowr ah.

Goobjoog News

Source: goobjoog.com