Yaa Hor Joogsaday Mooshinka Xaaladda Laascaanood Looga Gudbiyey Aqalka Sare Ee Dawladda Soomaaliya Oo Fashil Ku Dhamaaday

[Deeq A.]

Senatorrada dhalasho ka soo jeeda qaybo ka mid ah gobolka Sool ayaa dorraad oo Salaasa ahayd waxa ay guddoonka Golaha Aqalka Sare ee dawladda Soomaaliya u gudbiyeen mooshin la xidhiidha xaaladda ka taagan gobolka Sool oo ay doonayeen hab beelaysan in Golahaasi u eego qaddiyadda dagaalka Mahaalada magaalada Laascaanood kaasi oo ugu dambayn fashilmay kadib markii Shir Guddoonka Aqalka Sare ee Soomaaliya dib u dhigay Mooshinkaasi in laga hadlo wakhtigan.

Guddoomiye ku-xigeenka koowaad ee Golaha Aqalka Sare ayaa kalfadhigii dorraad ka sheegay in mooshinkaas ay qabteen, balse ay dib u dhigayaan kadib codsi laga daba keenay, sida uu sheegay. Kaasi oo meesha ka saaray in wakhtigan laga hadlo mooshinkaasi ay keeneen Xildhibaano dhalasho ahaan ka soo jeeda Magaalada Laascaanood.

 “Waxa jira mooshin ay keeneen Senatorada arrinta Sool iyo Laascaanood ku saabsan, mooshinkaas waa qabanay laakiin codsi ayaa ka daba-yimid oo ah in dib loo dhigo markaa dib ayaa u dhignay,” ayuu yidhi Guddoomiye Cali Shacbaan oo ah ku xigeenka kowoaad ee Golaha Aqalka Sare ee dalkaasi Soomaaliya.

Waxa uu intaas kusii daray “Marka uu xiligiisa soo dhameysto ee nidaamkiisa uu soo dhameysto ayaa isagana dib idinka soo wadaageyna. Wixii idinka noo qaadan ayaa sharci ah, anaga shraci ayaa ku shaqeynayna nidaam ayaa raaceyna gole ayaa nahay.” Mooshinkan laga gudbiyay xaaladda ka taagan magaalada Laascaanood ayaa imanaya, xilli uu sii xoogeystay dagaalka u dhaxeeya ciidamada qaranka Somaliland iyo kooxo huwan ah oo ku soo xad gudbay qaranimada Somaliland dhibaatana ka wada  magaalada Laascaanood.

Ma aha markii ugu horraysay ee Mooshin ka socda Magaalada Laascaanood la keeno golayaasha shacabka iyo Aqalka sare ee dalkaasi Soomaaliya kuwaasi oo ay keeneen xildhibaannada ka soo jeeda dhalasho ahaan Laaascaanood, mooshinadaasi oo fashilmay.

Source