Shirka Golaha Wasiirada oo looga hadlay Aadan Yabaal iyo arrimo kale

[Deeq A.]

Ra’iisul Wasaaraha Xukuumadda Federaalka Soomaaliya Xamse Cabdi Barre oo maanta guddoomiyay shirka toddobaadlaha ah ee Golaha Wasiirrada, ayaa uga warbixiyay safarkiisi degmada Aadan Yabaal oo shalay isaga iyo wafdigiisa uu si diirran ugu soo dhaweeyay Madaxweynaha Dowladda Hirshabeelle Cali Guudlaawe Xuseen.

Mudane Xamse ayaa ka warramay xaaladda nololeed ee degmada oo uu sheegay in Al-shabaab dhibaatooyin dhinac walba ah ay u geysteen shacabka ku noolaa degmada, isla markaana maanta ay dib u heleen xorriyad buuxda. Wuxuu ku ammaanay Ciidanka Xoogga Dalka Soomaaliyeed iyo dadka deegaanka ee naftooda u huray sidii looga xorreyn lahaa degmada.

Waxaa sidoo kale isna Golaha Wasiirrada warbixin siiyay Ra’iisul Wasaare Ku Xigeenka Saalax Jaamac, oo ka warramay shirarkii uu kaga qaybgalay dalalka Niger, Jabuuti iyo Angola, oo dhammaantood looga hadlayay arrimo la xiriira isbeddelka cimillada, amniga iyo isu dheelitirka horumarka dhaqaalaha dalalka Afrika.

Shirka Toddobaadlaha ee Golaha Wasiirrada ayaa waxaa lagu soo bandhigay laba hindise sharciyeed oo ay Golaha u soo bandhigeen Wasaarada Amniga Gudaha iyo Wasaaradda Arrimaha Gudaha, Federaalka iyo Dib u Heshiisiinta.

PUNTLND POST

The post Shirka Golaha Wasiirada oo looga hadlay Aadan Yabaal iyo arrimo kale appeared first on Puntland Post.