Ra’iisulwasaare hore Rooble oo madaxda Galmudug kala hadlay dagaalka ka dhanka ah ururka alshabaab

Deeq A. · October 17, 2022

Ra’iisulwasaarihii hore ee dalka Maxamed Xuseen Rooble, ayaa xarunta madaxtooyada Galmudug kulan kula qaatay madaxweynaha maamul gobaleedka Galmudug iyo qaar kamid ah xildhibaannada baarlamaanka ee deegaan doorashadooda tahay Galmudug.

Ra’iisulwasaare Rooble ayaa shalay gelinkii dambe gaaray magaalada Dhuusamareeb ee caasimadda dowlad gobaleedka Galmudug, halkaas oo uu sheegay in uu u tagay sidii uu qayb uga noqon lahaa howlgallada ka dhanka ah ururka alshabaab.

Madaxweynaha dowlad gobaleedka Galmudug Axmed Cabdi Kaariye Qoor-Qoor iyo qaar kamid ah xildhibaannada baarlamaanka ee deegaan doorashadooda tahay Galmudug iyo ra’iisulwasaare hore Rooble sidoo kale kala hadlay sidii loo dardargelin lahaa abaabulka dagaalka ka dhanka ah ururka alshabaab.

“Waan uga mahadcelinayaa madaxweynaha Galmudug Mudane Ahmed Abdi Kaarie, madaxweyne ku-xigeenka iyo bulshoweynta Galmudug sida diirran ee ay Dhuusamareeb noogu soo dhaweeyeen aniga, madaxweynihii hore ee Galmudug iyo wefdi ka kooban wasiirro, xildhibaanno iyo mas’uuliyiin kale. Waxaan galabta Galmudug u soo gaarnay si aan kaalinteenna uga qaadanno xoreynta Galmudug,” ayuu yiri ra’iisulwasaarihii hore ee dalka Maxamed Xuseen Rooble.