Xasan Sheekh iyo Siciid Deni oo xalay yeeshay kulan gaar ah oo albaabadu u xiran yihiin

[Deeq A.]

Madaxweynaha Soomaaliya, Xasan Sheekh Maxamuud oo shalay soo gaaray caasimadda Garoowe iyo Madaxweynaha Puntland, Siciid Cabdullaahi Deni ayaa xalay kulan gaar ah yeeshay, sida ay xaqiijinayaan warar lagu kalsoon yahay.

Kulanka ayaa ahaa mid albaabadu u xiran yihiin, oo ay ku wada-hadlayeen labada Madaxweyne oo keliya, islamarkaana aysan cidna ku wehelin, waxaana adag in faahfaahin hoose laga helo wixii ay ka wada-hadleen.

Maanta ilaa Caawa ayaa sidoo kale lagu wadaa in ay sii socdaan kulamo kale oo lagu wada-hadlayo, kuwaas oo labada Madaxweyne ay ku wehelin doonaan mas’uuliyiinta labada dhinac.

Waxaa jirta arrin si gaar ah isha loogu hayo oo ku saabsan mudda kordhinta Madaxweynaha Jubaland Axmed Madoobe, taas oo la filayo in labada dhinac isla soo qaadaan.

Madaxweyne Xasan Sheekh ayaa sida wararku sheegayaan doonaya in uu ogaado mowqifka Puntland ka taagantahay mudda kororsiga Jubaland, ka hor inta aanu isagu wax go’aan ah ka qaadan.

PUNTLAND POST

The post Xasan Sheekh iyo Siciid Deni oo xalay yeeshay kulan gaar ah oo albaabadu u xiran yihiin appeared first on Puntland Post.