Wadada Garowe iyo Boosaaso: Dayactir lagu sameeyay 45 biyo mareen iyo 4 buundo

[Deeq A.]

Mas’uuliyiin ka tirsan Golaha Wasiiradda Puntland ayaa maanta xariga ka jaray 45-Biyo mareen oo laga dayactiray inta u dhexaysa Boosaaso iyo Kalabayr iyo 4-buundo oo ku yaalla deegaanka Qayaadsame.

Daah-fuurka buundooyinka waxaa ka qeyb galay Wasiirka Maaliyadda, Wasiirka Hawalaha Guud, Wasiirka Warfaafinta, Wasiiru dowlaha Arrimaha Gudaha, Wasiir ku-xigeenka Warfaafinta, Gudoomiyaha Hay’adda Wadooyinka Puntland ee PHA, Maamulada Gobolada Bari iyo Karkaar, iyo marti sharaf kale.

45-Biyo mareen oo laga dayactiray inta u dhexaysa Boosaaso iyo Kalabayr ayaa waxaa fuliyey dhismihiisa Mashruuca dhismaha Ceel-daahir Ceerigaabo, halka Shirkada Albaashid ay dib u dayactirtay buundooyinka Qayaadsame oo ka kooban 4 buundo.

Wasiirka Wasaradda Maaliyadda Puntland Xasan Shire Cabdi ayaa sheegay in Dowladda u hogaamiyo Madaxweyne Siciid Cabdullaahi Dani ay dayactirka wadooyinka ay ahmiyad weyn siisay kuwaas oo ah isha kaabayaasha dhaqaalaha.

Sidoo kale Wasiir Abgaal ayaa tilmaamay in lacagta lagu bixiyay dhismaha wadooyinkaan ay ka timi ganacsatada oo bixiyay canshuurta taasi oo ay dowladu ku wajahday in lagu dayactiro wadooyinka.

Wasaaradda Maaliyadda Puntland ayaa sheegtay in ay dayactiro wadooyinka ku bixisay lacag dhan $11,000,000 (Kow iyo toban milyan oo doolar).

PUNTLAND POST

The post Wadada Garowe iyo Boosaaso: Dayactir lagu sameeyay 45 biyo mareen iyo 4 buundo appeared first on Puntland Post.