Madaxweyne Xasan oo dib ugu soo laabtay dalka, balse isla maanta u baxaya safar kale

[Deeq A.]

Muqdisho (Caasimada Online) – Madaxweynaha Soomaaliya, Mudane Xasan Sheekh Maxamuud oo booqasho hal maalin ah ku tegay dalka Jamhuuriyadda Jabuuti ayaa maanta dalka dib ugu soo laabtay, kadib wadahadallo uu la soo yeeshay Ismaaciil Cumar Geelle.

Madaxweynaha ayaa waxaa garoonka kusoo dhaweeyey mas’uuliyiin ka tirsan golayaasha dowladda, waxaana kadib loo galbiyey dhismaha xarunta madaxtooyada Soomaaliya.

Xasan Sheekh iyo wafdigiisa oo xalay kusoo hoyday Jabuuti ayaa madaxda dalkaas kala soo hadlay arrimo ay ka mid yihiin xoojinta xiriirka labada dal iyo sidii looga wada shaqeyn lahaa arrimaha ammaanka, dhaqaalaha iyo iskaashiga labada dowladood ee walaalaha ah.

Sidoo kale madaxweynaha ayaa waxaa dhiggiisa Ismaaciil Cumar Geelle uu guddoonsiiyey billad sharafta ugu sareysa Jabuuti, kadib casho sharaf loogu sameeyey madaxtooyada.

Dhinaca kale warar ay heeshay Caasimada Online ayaa sheegaya in isla maanta gelinka dambe madaxweynuhu u bixi doono safar uu ku aadayo dalka Itoobiya.

Madaxeynaha ayaa casuumaad rasmi ah ka lehay ra’iisul wasaaraha dalkaasi oo uu la yeelan doono wada-hadallada ku aadan xoojinta xiriirka labada iyo iskaashiga amniga, sida ay innoo xaqiijiyeen ilo ku dhow Villa Soomaaliya.

Safarkan ayaa noqon doono kiisii lixaad, wuxuuna Xasan horey u booqday waddamada Imaaraadka, Turkiga, Eritrea, Kenya iyo Jabuuti oo uu maanta uun dib uga soo laabtay.

Soomaaliya ayaa waxaa ka dhacay isbedel siyaasadeed, kadib 15-kii May oo dib loo doortay madaxweyne Xasan Sheekh ooo ballan-qaaday Soomaali heshiis ah, dunida heshiis la ah.

The post Madaxweyne Xasan oo dib ugu soo laabtay dalka, balse isla maanta u baxaya safar kale appeared first on Caasimada Online.