DEG DEG: Ra’iisul Wasaarihii hore ee Japan oo toogasho lagu dilay + Sawirro

Deeq A. · July 8, 2022

Tokyo (Caasimada Online) – Ra’iisul wasaarihii hore ee Japan Shinzo Abe ayaa ku geeriyooday isbitalka maanta oo Jimce ah saacado kadib markii la toogtay isaga oo ku sugan goob uu ka socday olole doorasho, waxaa sidaas weriyey warbaahinta gudaha.

Ayada oo soo xiganeysa xubin sare oo ka tirsan xisbiga Abe ee Liberal Democratic Party ayaa warbaahinta qaranka ee NHK waxay tiri “ra’iisul wasaarihii hore wuxuu ku dhintay isbitalka magaalada Kashihara ee gobolka Nara, halkaasi oo lagu daweynayey. Wuxuu ahaa 67 jir.”

Geerida ayaa waxaa sidoo kale weriyey warbaahinta kale ee Japan sida wakaaladaha wararka Jiji iyo Kyodo.

Dilka siyaasiyigii ugu caansanaa Japan ayaa imanaya ayada oo Japan ay leedahay mid ka mid ah xeerarka ugu adag ee xakameynta hubka, iyo ayada oo uu socday ololaha doorashooyinka deegaanka ee dhacaya Axadda.

Goor sii horeysay ra’iisul wasaare Fumio Kishida ayaa ka baaqday masraxa ololaha wuxuuna diyaarad qumaatiga u kacda u raacay caasimadda Tokoyo, halkaasi oo uu kula hadlay weriyayaasha isaga oo codkiisa aad u dabacsan yahay.

“Ra’iisul rasaarihii hore Shinzo Abe waxaa lagu toogtay Nara, waxaana la ii sheegay inuu ku sugan yahay xaalad aad u liidata,” ayuu yiri.

“Waxaan ku duceynayaa in ra’iisul wasaarihii hore Abe uu badbaadi doono. Waxaan cambaareynayaa weerarkan arxan darrada ah ee dhacay ayada oo lagu jiro olole doorasho oo ah aas-aaska dimoqraadiyadda.”

Weerarkan ayaa ka dhacay gobolka galbeed ee Nara waxyar kahor 12-kii duhurnimo, halkaasi oo Abe oo 67 jir ahaa uu ka jeedinayey khudbad ayada oo ilaalo ay joogeen, balse daawadayaasha ayaa awooday inay si fudud ugu soo dhowaadaan.

Muuqaallo uu baahiyey taleefishinka NHK ayaa muujiyey isaga oo taagan masraxa markii nin wata shaati leh midab cowl ah iyo surwaal qaxwe ah uu billaabay inuu gadaal kaga soo dhowaado kadibna uu wax kala soo baxay boorso oo uu billaabay inuu toogto.

Ugu yaraan laba xabad ayaa u muuqday in la riday.

Goobjoogeyaal ayaa sheegay in ciidamada amniga ay qabteen ninka lagu tuhmayo toogashada oo loo xiray tuhun ku saabsan isku day dil.

Warbaahinta gudaha ayaa ninkaas ku sheegay 41 jir lagu magacaabo Tetsuya Yamagami, ayaga oo soo xiganaya ilo-wareedyo boolis, waxaana dhowr warbaahin ay sheegeen inuu horey uga tirsanaa ciidamada Maritime Self-Defense Force ee badda.