TikTok oo halis ugu jirta inay suuqa ka baxdo kadib amar kasoo baxay Mareykanka

[Deeq A.]

Washington (Caasimada Online) – Gudomiyaha guddiga Isgaarsiinta ee dalka Mareykanka ayaa ku amray shirkadaha Google iyo Apple inay aalada TikTok hawadooda ka saaraan sababo la xiriira amniga awgeed.

Amarkaan ayaa dhigaya in shirkadaha Google iyo Apple ugu dambeyn ay 8-da July ee sanadkaan fuliyaan, taasi oo horseed u noqoneysa hoos u dhac weyn oo ku yimaada TikTok oo xiligan haysta Balaayiin dad ah.

Apple iyo Google ayaa illaa hadda wax jawaab aan kasoo saarin amarkaan kasoo baxay dowladda Mareykanka, hase yeeshe warbixin ay soo saartay TikTok ayaa lagu sheegay in shirkadda aysan ka shaqeyn waxyaabo amniga halis ku ah.

“Sida shirkado badan oo caalami ah, TikTok waxay leedahay kooxo injineero ah oo adduunka ah, shirkadda waxay ilaalisaa xogta dadka isticmaala,” ayaa lagu yiri warbixinta ay isku difaaceyso.

Sidoo kale waxay shirkada TikTok ay ku tilmaamtay amarka uu dul dhigay Mareykanka shirkadaha Google iyo Apple ee ka dhanka ah in uu yahay marin habaabin aan sal iyo raad toona laheyn.

TikTok ayaa hore u wajaheysay xanibaadyo hor leh kadib markii ay waddamo badan ka mamnuuceen dalalkooda aalada TikTok, iyadoo la aaminsan yahay inay tahay qaab farsameysan oo xogta gaarka ah ah ee qofka (Personal Data) lagu ogaan karo.

The post TikTok oo halis ugu jirta inay suuqa ka baxdo kadib amar kasoo baxay Mareykanka appeared first on Caasimada Online.