Villa Somalia oo ka hadashay dhab ahaanshaha safar qarsoodi ah ee Israel

[Deeq A.]

Muqdisho (Caasimada Online) – Afhayeenka Madaxtooyada Soomaaliya ayaa beeniyay hadal hayn ka dhalatay safarkii madaxweyne Xasan Sheekh Maxamuud iyo wafdigiisa ee Isu-tagga Imaaraadka Carabta.

Waxa uu beeniyay in uu jiro safar qarsoodi ah oo madaxda Soomaaliyeed ay ku tageen Israel, oo ay Soomaaliya la laheyn xiriir diblomaasiyadeed.

“Israel ma Imaaraadka ayey ku dhex taalla? Maya, maadama laheyn xiriir diblumaasiyadeed haddii la tago xataa wax la qaraniyo ma aha, laakiin lama tagin,” ayuu yiri Afhayeenka Madaxtooyada Soomaaliya.

Sidoo kale waxa uu sheegay in Madaxda uu hogaaminayay madaxweyne Xasan Sheekh Maxamuud ay ku eekeyd booqashadooda dalka Imaaraadka, islamarkaana uusan jirin qorshe safar oo qarsoodi ah.

Hadalkaan ayaa imanaya xili ay soo baxayeen warar si weyn ugu faafay baraha bulshada, kaasi oo la xiriiray in Madaxdii Soomaaliyeed ee u safartay Imaaraadka ay safar qarsoodi ah uga sii gudbeen Israel.

Hadal hayntan ayaa timid kadib markii safarka Madaxweynaha iyo wafdigii uu hogaaminayay uu qaatay maalmo dheeraad ah oo aan markii hore qorshaha ugu jirin, taasi oo sida aan ogaanay ay keentay kadib markii xubno kamid ah wafdiga laga helay Coronavirus.

Hoos ka daawo muuqaalka

The post Villa Somalia oo ka hadashay dhab ahaanshaha safar qarsoodi ah ee Israel appeared first on Caasimada Online.