Gudoomiyaha Baarlamanka Puntland oo khudbad ka jeediyay Kal-fadhiga 50-aad

[Deeq A.]

Guddoomiyaha Golaha Wakiillada Dawladda Puntland Mudane, Cabdirashiid Yuusuf Jibril ayaa Khudbad ka jeediyay Furitaanka Kalfadhiga 50-aad ee Golaha Wakiillada DPL kaas oo uu si rasmi ah u furay Madaxweynaha Dawladda Puntland Mudane, Siciid Cabdullahi Denni sida uu qabo qodobka 80-aad farqadiisa 12-aad ee Dastuurka Dawladda Puntland.

Furitaanka Kal-fadhiga 50-aad waxaa ka qeyb galay Madaxweyne Ku-xigeenka DPL Mudane Axmed Cilmi Cismaan Karaash, Guddoomiye ku-xigeenka 1aad Golaha Wakiilladda Mudane, Cabdicasiis Cabdullahi Cusmaan, Guddoomiye ku xigeenka 2aad ee Golaha Wakiiladda Mudane, Ismaaciil Maxamed Warsame, Xildhibaanada Golaha Wakiillada Puntland, Wasiiro, Taliyeyaasha ciidanka iyo marti sharaf kale.

Guddoomiyaha ayaa ka hadlay shaqooyinka Guddiyadda Golaha intii u dhexeysay 2da Kalfadhi.

” Muddadii u dhexaysey labada kalfadhi, Guddiga joogtada ahi waxay wadeen dhammaan hawlihii shaqo ee Golaha Wakiillada si waafaqsan Dastuurka iyo Xeer-hoosaadka Golaha Wakiillada, sidoo kale guddiyada Goluhu iyagoo ka duulaya qodobada 16-aad iyo 62-aad ee xeer-hoosaadka Golaha Wakiillada waxay muddadii u dhexaysey labada kalfadhi kormeer shaqo ku tageen Gobollada iyo Degmooyinka Puntland, waxayna korjoogtayn iyo u-kuur-gal kusoo sameeyeen hay’adaha dawladda si ay xog-ogaal ugu noqdaan sida bulshada loogaarsiiyey adeeggayada arrimaha bulshda, warbixinadda kormeeradaas oo faah-faahsan waxay guddiyadu soojeedin doonaan inta lagu gudajiro kalfadhigan haddii EEBBE idmo.”

Guddoomiyaha Golaha Wakiillada ayaa ka hadlay arrimobadan oo la xiriira gudaha Puntland, waxa uuna ku booriyey shacabka iyo Dawladda adkaynta Nabadgelyada, midnimada iyo wada-jirka Puntland, sidoo kalena waxa uu si faah-faahsan uga hadlay shaqooyinkii ay Golaha qabteen, dhismaha xarunta cusub Aqalka Wakiilladda, wada-shaqeynta Baarlamaanka JSF iyo kan Puntland.

Dhinaca kalena, Guddoomiyaha ayaa mar kale Hambalyo u diray Madaxweynaha JFS Mudane, Xassan Sheikh Maxamuud.

” Waxaan mar labaad Madaxweynaha cusub ee loo doortay Jamhuuriyadda Federaalka Soomaaliya Mudane, Xassan Sheekh Maxamuud iyo madaxda labada gole ee Baarlamaanka Federaalka Soomaaliya ee iyagana la doortay waxaan leeyahay hambalyo,waxaan IIlaahay uga rajeynayaa inuu u fududeeyo waajibaadkooda shaqo.”

PUNTLAND POST

The post Gudoomiyaha Baarlamanka Puntland oo khudbad ka jeediyay Kal-fadhiga 50-aad appeared first on Puntland Post.