Maraykanka oo ka warbixiyay wada-hadalkii Antony Blinken iyo Xasan Shiikh Maxamuud

[Deeq A.]

Dowladda Maraykanka ayaa ka warbixisay wada-hadal khadka isgaarsiinta ku dhexmaray xoghayaha arrimaha dibedda Maraykanka, Antony Blinken iyo madaxweynaha Soomaaliya, Xasan Shiikh Maxamuud.

Af-hayeenka waaxda arrimaha dibadda Maraykanka Ned Price ayaa sheegay in labada mas’uul ka wada-hadleen arrima ay kamid yihiin; dib u heshiisiinta Soomaaliya, dhismaha ciidamo amni oo la wareegi kara mas’uuliyadda qaran iyo hannaanka deyn-cafinta dalka.

“Waxa ay ka wadahadleen muhiimadda ay leedahay dib u heshiisiin siyaasadeed, horumarinta ciidamo amni oo la wareegi kara mas’uuliyadda howlgalka Midowga Afrika ee ku meel gaarka ah ee Soomaaliya ee ATMIS, iyo dib u habeynta dhaqaalaha, ee lagama maarmaanka u ah dhameystirka waddada deyn cafinta ee Soomaaliya” ayuu yiri af-hayeenka.

“Isagoo [xoghaye Blinken] xusaya go’aankii dhawaan Madaxweyne Biden uu ku sheegay in si joogto ah Soomaaliya dib loogu celiyo ciidamada Maraykanka, xoghayuhu wuxuu u gudbiyay madaxweynaha Soomaaliya taageerada joogtada ah ee Maraykanka ee dadaalka ay dowladda Soomaaliya iyo ururka Midowga Afrika ugu jiraan la dagaalanka khatarta kooxaha argagixisada ah” ayuu sii raaciyay.

PUNTLAND POST

The post Maraykanka oo ka warbixiyay wada-hadalkii Antony Blinken iyo Xasan Shiikh Maxamuud appeared first on Puntland Post.