Xasan Sheekh Maxamuud Oo U Magacaabaya Shariif Sheekh Axmed Wakiilka Gaarka Ah Ee Wada-Hadallada Somaliland Iyo Soomaaliya.

[Deeq A.]

(SLT-Hargeysa)-Xog ay heshay warbaahinta magaalada Muqisho oo ay Somalilandtoday soo xigatay ayaa sheegeysa in madaxweynaha Soomaaliya Xasan Sheekh Maxamuud uu xil sare u magacaabi doono madaxweynihii hore ee Soomaaliya Shariif Sheekh Axmed.

Ilo-wareedyo ka dhow madaxweyne Xasan Sheekh ayaa sheegay in Sheekh Shariif u magacaabi doono wakiilka gaarka ah ee wada-hadallada Somaliland iyo Soomaaliya.

Arrimaha ugu weyn ee loo magacaabayo Shariifka ayaa qeyb ka ah inuu dowladda federaalka wakiil ugu noqdo wada hadallada Somaliland oo dowladda cusub madaxweynaheeda u qorsheysan in lasoo celiyo.

Xasan Sheekh oo markii uu Isniintii xafiiska la wareegay billaabay magacaabis iyo inuu beddalo agaasinkii Villa Somalia ayaa wuxuu horey ugu magacaabay Cabdiaxmaan Cabdishakuur Warsame inuu noqdo ergayga gaarka ah madaxweynaha u qaabilsan arrimaha gurmadka abaaraha Somalia.

Madaxweyne Xasan Sheekh ayaa u muuqda inuu soo dhoweysanaayo siyaasiyiinta ololaha doorashada kula jiray ee sida weyn u mucaaradsanaa maamulkii madaxweyne Farmaajo. Sidoo kale, wuxuu u muuqdaa inuu isbadal ku sameyn doono siyaasidihii hore uu ugu soo maamulay Soomaaliya 2012-2017.

Source