Magaalo ku taala dalka Ukraine oo iska caabisey Duullaanka Ruushka+Waxa u sahlay

[Deeq A.]

 Magaalo ku taala dalka Ukraine oo iska caabisey Duullaanka Ruushka+Waxa u sahlay

Melitopol waa magaalo ku taalla Koonfurta-Bari ee dalka Ukraine

Ciidammada Ruushka ayaa iska caabbin xooggan kala kulmay shacabka ku nool magaalada Melitpol oo ay bishii February ciidammnada Ruushka soo gaareen.

Dadka daggaan magaaladaasi ayaa ishortaag ku sameeyey kolonyada baabuurta ee isku dayayey iney magaaladaasi qabsadaan, shacabka aan hubeysneyna waxaa la arkayey iyaga oo isugu soo baxay waddooyinka waaweyn ee magaaladaasi oo ruuxaya calanka dalka Ukraine.

Markii uu Ruushku billaabay in uu xakameeyo mudaharaadayaasha wada dhaqdhaqaaqa iska caabbinta waxaa ka dhalatay iney abuurmaan kooxa cusub oo si weyn u abaabulan oo dagaal uga soo horjeesta Ruushka iney magaaladaasi ka abuurmaan.

Sida laga soo xigtay Machadka Daraasaadka Dagaalka uu fadhigiisu yahay Mareykanka, Melitopol waa magaalo door firfircoon ku lahayd dagaalka lagula jiro Ruushka tani iyo bartamihii bishii Maarso.

Agaasinka sirdoonka milatariga ee Ukraine wuxuu sheegay laga billaabo 20-kii Maarso ilaa 12-kii Abriil kooxahaasi “In ay dileen 70 askari oo Ruush ah intii ay ku jireen ilaalada habeenkii”.

 

Waxayna kooxahaasi si aan kala joogsi lahayn u sii wadaan weerarrada ka dhanka ah ciidammada Ruushka.

Arbacadii la soo dhaafay tareen gaashaaman oo uu Ruushku leeyahay ayaa la sheegay in marinkii laga leexiyay. Maalmo ka horna, laba askari oo Ruush ah ayaa meydkooda laga helay waddada. Bishii hore buundo u dhow Melitopol oo saadka loo marin jiray ciidamada Ruushka ayaa la qarxiyay.

Buundada la burburiyey ee ku taalla meel ku dhow magaalada Melitopol

Mayarka magaalada Melitopol Ivan Fedorov wuxuu sheegay weerarrada qasaaraha ba’an u geystay Ruushka iney soo abaabuleen kooxo iskood iisu abaabulay oo hubeysan oo ka kooban qaybaha kala duwan ee shacabka magaaladaasi oo wada shaqeyn dhaw la leh ciidamada Ukraine.

“Waa howl ay geesiyaashayada, sirdoonkeenna iyo ciidamadeenna si wada jir ah u qabteen,” ayuu yiri.

Fedorov laftiisa wuxuu gacanta u galay ciidammada Ruushka inkasta oo markii dambe la sii daayey xilligii maxabiista la isdhaafsanayey.

Ruushkana waxay ku dadaalayaan sidii ay gabi ahaanba u baab’in lahaayeen kooxaha iska caabbinta wado. Iyaga oo baaritaan aan kala joogsi laheyn ku sameeya guryaha, dadkana xarig aan kala sooc laheen kula kaca.

29-kii Abriil, rag hubaysan oo ku labbisan dareeska milatariga oo ay ka muuqato astaanta ay adeegsadaan askarta Ruushka ayaa afduubtay Boris Kleshev, madaxa dabdamiska maxalliga ah ee Melitopol.

Muddo laba toddobaad ah ayay eheladiisu waxba ka maqal halka uu ku sugan yahay. Maalmo ka hor, Kanaal Telegram ah oo taageera Ruushka ayaa soo bandhigay muuqaal muujinaya Mr Kleshev iyo rag kale oo Ukraine u dhashay oo qirtay inay xogta dhaqdhaqaaqa Ruushka la wadaagayeen militariga Ukraine.

Kleshev waxa uu ku hadlayay cod hoose, oo u muuqday hadalka uu sheegay inuu ahaa mid lagu qasbay. Laakiin xitaa haddii ay u egtahay qirasho qasab ah, kuwa muuqaalkaasi sameeyey ujeedkoodu inuu ahaa farriinta uu ninkaasi gudbinayo iney saameyn ugu geystaan kooxaha iska caabbinta wada ama ay ku niyad jabiyaan.

Kooxda iska caabbinta ka waddo magaalada Melitopol ayaa ah koox tira yar balse dhaqdhaqaaqooda uu xooggan yahay.

“90% shacabka deggan si toos ah ama si dadban waxay uga tirsan yihiin kooxda iska caabbinta waddo iyaga oo kacdoonkaasi siyaabo kala duwan uga qayb qaadanaya,” ayey tiri Svitlana Zalizetska oo ah wariye maxalli ah.

“Dadka qaarkood waxaa keliya oo ay sameeyaan iney askarta Ruushka il neceyb ah ku eegaan. Halka qaarna ay ku heesaan heeso waddani ah markasta oo ay arkaan ciidamada Ruushka gaar ahanna xilliyada habeenkii. Dadka qaarkiis waxay waddooyinka suraan ama ku dhajiyaan calamada Ukraine,” ayay tiri, iyada oo raacisay in qaarkood ay sidoo kale gudbiyaan macluumaadka ku saabsan dhaqdhaqaaqa milatari ee ay ciidamada Ruushka magaaladaasi ka wadaan.

Dadweyne isugu soo baxay bannaanka hore ee xarunta maamulka gobolka ee Melitopol markii la sheegay in la afduubay maayarkii magaalada

Tani iyo markii uu bishii Fabraayo uu billaawday duullaanka Ruushka dadka daggan magaalada Melitpol waxay dhigayeen mudaharaadyo ka dhan ah ciidamada Ruushka. Marwelibana waddooyinka ayey shacabka isugu soo baxayeen iyaga oo Ruuxaya calanka dalka Ukraine oo ku dhawaaqaya halku dhigyo ay ka mid yihiin: “Melitpol Ukraine baa leh.”

“Ciidamada Ruushka aad ayey uga argagaxeen oo ay ula yaabeen dadka magaaladaasi sida ay raalliga uga ahayn aragtida ciidamada Ruushka. Askartaasi oo rumeysan iney yihiin kuwa u yimid iney wax xoreeyaan,” ayey tiri Iryna (magaceeda saxda la qariyey), oo ku nool magaalada Melitopol.

 

Ciidamada Ruushka oo u adkeysan la’ iska caabbinta iyo mucaaraddada xooggan ee ay shacabka magaaladaasi kala kulmeen waxay marweliba isku dayaan qof kasta oo si cad uga soo horjeesto iney aamusiyaan.

Mayorka magaalada Melitopol Ivan Fedorov

Svitlana Zalizetska, oo maamuli jirtay mareegta caanka ah ee wararka, ayaa lagu cadaadiyay inay la shaqeyso masuuliyiinta cusub ee uu soo magacaabay militariga Ruushka. Wayna diiday. Markii duqa magaalada, Mr Fedorov, la afduubay, Svitlana waxay xaqiiqsatay inay iyadu ku xigi karto. Kadib waxay u baxsatay dhulka ay maamulaan ciidamada Ukraine.

Kadib, saraakiisha Ruushku waxay billaabeen inay u hanjabaan qoyskeeda. “Marka hore waxay rabeen inay burburiyaan mareegaha, wayse ku guuldareysteen,” ayay tiri. “Kadib waxay damceen inay i qabtaan, mar labaad ayay ku guul-darreysteen, ka dib waxay xidheen aabbahay oo ay qafaasheen si aan aniga u soo noqdo, oo aan u maamulo mareegaha.”

Keliya markii ay si cad u qiratay in aanay mar danbe lahayn bogga website-ka oo ay joojisay qoraalkii, ayay sii daayeen aabaheed.

Ciidamada Ruushka ayaa abaabulaya dhaqaalo si ay wax uga beddelaan aragtida taageersan Ukraine ee shacabka Melitopol.

Waxay si ba’an u rabaan inay helaan dugsiyo, dukaamo iyo ganacsiyo si ay dib ugu furaan iyadoo ujeedadu tahay soo bandhigida qaanuunka Ruushka iyaga oo dhanka wanaagsan bulshada ka tusaya.

Qaar ka mid ah dadka deegaanka, oo aan haysan wax dhaqaale ah oo ay ku quudiyaan qoysaskooda, ayaa ku soo laabanaya shaqada xitaa haddii ay ka dhigan tahay inay taageerayaan nidaamka cusub ee Ruushka.

“Haddii ay jidh ahaan u dilayaan dadka reer Yukreeniyaan ee Mariupol, halkan waxay isku dayayaan inay naftayada jebiyaan,” ayay tiri Iryna. “Laakiin way ku guuldareysan doonaan.”

Qaran News