Gabadh hooyadeed kiraynaysaa miyey suuqa xun ka bixi kartaa reer Somalilandow….Siyaasi Cali Kubad

[Deeq A.]

Gabadh hooyadeed kiraynaysaa miyey suuqa xun ka bixi kartaa reer Somalilandow….Siyaasi Cali Kubad

Goolaaftanka siyaasadu wax innagu cusub maaha, ee waxa innagu cusub awrtan heeryadooda cunaysa markay awooda siyaasadeed yeeshaan. Waxaynu xasuusanaa nin wasiir ahaa oo yidhi ma “ ma Suurta ayaa la afuufayaa”, iyo madaxweyne Muuse oo sheekadaas sii yara qurxiyey oo yidhi “ booli xooftada innaga daaya”, waqtigan xaadirka ahna musharax madaxweyne C/raxmaan ayaa yidhi “ dalka anigaa u tudhay”, goob kalena ka sheegay oo dhalinyarada xasuusiyey “ maalinta aan siidhiga idiin afuufayo doono uun suga”, gudoomiye Faysalna waxuu yidhi “ Muusow Xarshin baad tegi doontaa waayo Hargeysa anigaa iska lehe”. Hadaladaas oo dhami waa iska goolaaftan siyaasadeed oo intay kaftan uun ku egyihiin tageero raadiska ah (Rhetoric) ma xuma, laakiin ilaa iyo intee in le’eg baynu booshaaqtan kan sii wada karnaa iyo kibirkan Iidooreysan. Madaxweyne Muuse waxuu carabka u laadlaadiyey dadka intii ururada in la furo dooneysey oo iyaguna u qaatay inay aarintaasi ka dhab tahay Muuse; Xisbiyadii mucaaridka ahna Muuse wuu la qaad walaynayaa. Gudidii kommishanka doorashooyinka qarankana muska ayuu uga dhacay oo fardhidkii ugu horeeyey waa innagaas aragna ee uu mid ka mid ahi is casiley, iyadoo lagu tuhunsan ahay inay iscasilaadaas kommishineerku ahayd mid ku fadhida qaaciidooyinka iyo duruusta lagu dhigan jirey jaamacad weynta siyaasada ee Qaaxo. Waxa iska cad inuu Madaxweyne Muuse fool eri ku wado muddo kordhinta uu maleegayo in loo sameeyo. Waxa bilaabantay mujaahidiin baanu nahay iyo madaxda xisbiyada mucaaidka ahi faqashta ayey la shaqayn jireen. Madaxweyne Dahir Rayaale miyaanu korneel sirdoonka ah ahaan jirin, hadana miyaanu markuu madaxweynaha noqday noqonin Madaxweyne shaqadiisii si fiican u gutey, waxaan qirayaa Muusow inuu Rayaale kaa madaxweynenimo fiicnaa.

Madaxweyne Muuse lix bilood laba maalmood ay ka dhiman tahay, baa uga hadhay muddo xileedkii loo doortay, suurta galna maaha intuu urarada furo hadana uu doorashadii madaxweyne-nimada uu waqtigeedii ku qabto. Kommishankii doorashooyin kana waa kaas ka dhigay xero adhi oo waraabe usoo dhacay. Saaka waxaan arkayey qoraal usoo saaray Agaasimaha guud ee kommishanka oo uu leeyahay shaqaalihii kommishanka waa la kala diray, sababtoo ah buu yidhi khilaaf baa soo kala dhex galay xubnihii gudida kommishanka doorashooyinka Qaranka JSL. Halkaasna waxa innooga cad inaanu Madaxweynuhu u jeedin qabashadii doorashada madaxweynenimada 13 November, 2022. Mar haddii dadkii loo igmaday inay dalka hogaamiyaan ee madaxda ka ahaa kursiga uga sareeyana ku yimi doorasho ay distoorkii innoo yaalay, ay hadba siday rabaan ugu faygarayaan, miyeynu ka fursanaysaa in hadalladaas xajiinta leh ee imminka sida dhibta yar la isugu leeyahay ay keeni karaan ficil xumo aan laga soo waaqsanin abid. Ruuxa dalka loo doortay ee loo dhaariyey haddii aanu distoorka iyo xeerarka dalka u yaala innagu dhaqin miyaanu noqonayn sidii hooyadii inanteeda karaysay oo kale. Madaxweyne Muusow dadka bal meel uun dhaqaaji ilayn kaa yeeli mayno ila meeraysadaas aad lixda bilood ee kuu hadhay aad ku lumineyside. Aragti baa tidhaahda dimuquraadiyada “dunida saddexaad” waxa baabi’ya kuwii lagu soo doortay dimuquraadiyada. Hadaba, suurta gal maaha inaanu kugu daawano sidan foosha xun aad dimuquraadiyada u jilayside, ma ku xisaabtantay inaan shirbeeleed laga fursanaynin ilayn qori caaradii iskumaynu qabsane. Boqorkii dhuux-baraar sheeko xariir been been ah bay ahayde, Madaxweyne Muusow ha nagu noqonin dhuuxbaraarkii dhabta ahaa ee qarnigan Kow iyo labaa tanaad, oo mustaqbalka dhaliyarada reer Somaliland ay is leeyihiin qaddo ka dhigta adigu ha ku sii quraacanin, oo dhafoor taabashada jooji. Dalkana dib ugu soo laab shaqayntii iyo sarayntii distoorkii lagugu doortay oo hufan. Kommishineer kaas aad is casilidiisa ka danbeyseyna Muusow soo dadeji bedelkiisa sida uga dhakhsaha badan.

Qaran News