Xog: Murashaxiin doonaya in dib loo dhigo doorashada madaxweynaha Soomaaliya

[Deeq A.]

Muqdisho (Caasimada Online) – Qaar ka mid ah murashaxiinta madaxweyne ayaa wada isku-day ay ku doonayaan in wax laga beddelo jadwalka doorashada madaxweyne ee loo qorsheeyay inay qabsoonto 15-ka bisha May, sida ay ogaatay Caasimada Online.

Murashaxiintaan ayaa doonaya in maalinta ay qabsoomeyso doorashada laga dhigo 25-ka May, hase ahaatee qorshahaan ay wadaan murashaxiinta qaarkood ayaa aheyn mid xooggan.

Ma muuqato astaan muujineyso dib u dhac ama qorshe isbeddel lagu sameynaayo maalinta loo asteeyay inay qabsoonto doorashada madaxtinimada ee 15-ka May.

Guddoomiyaha Guddiga Doorashada Madaxwenaha Soomaaliya Cabdiqani Geelle ayaa sheegay in muddada tobanka maalmood ah ee soo socota ay ku qaban doonaan doorashada madaxweynaha Soomaaliya ayna ku filan tahay musharixiinta in ay isku diyaariyaan.

Guddoomiyaha ayaa yiri “Waxaan tixraac ku sameynay tii gudoonka baarlamaanka oo tiradu intaa ka badnayd, waqtiguna uu intaa aad iyo aad ugaa koobnaa, waan isbarbar dhignay, waxaana noo soo baxday inay ku filan tahay waqtiga aan u qabanay.”

Mar wax laga waydiyey waxa u qorsheysan inay sameeyaan haddii doorashada ay ku dhici weyso waqtigii ay u qabteen ayuu ku jawaabay “ Inshaa Allah way ku dhici doontaa, musharixiinta tartamayo waa la yaqaan waa ay isku key dul saaran yihiin, mana jirto waqti aan anaga luminay, musharixiinta iyo xidhibaanada dhan waa ogol yihiin, waxaana xataa la shaqeyn karaa habeen, wax naga qaldan ma jiraan haddiiba ay noo joogaan musharixiintii, guddoonkii baarlamaanka iyo xildhibaanadii, ilaahey kama rajeeneyno dib u dhac iyo in waqtii aan qabanay wax ku dhici waayaan” .

Dowladda Soomaaliya ayaa lumin doonta haddii doorashada ay ka dib dhacdo 17-ka May taageerada dhaqaale ee beesha caalamka iyo hay’adda lacagta adduunka “IMF” ku kabto Soomaaliya, sidoo kale waxaa xiligaasi dhaceyso waqtiga dib u eegista qorshaha dib u eegista  

Dowladda federaalka ayaa ka codsatay hay’adda lacagta aduunka IMF in ay kordhiso mudada ay joogsaneyso dhaqaalaha dalku ka helo deeq-bixiyeyaasha oo dhacaysa 17-ka bisha May.

Wasaaradda maaliyadda iyo bankiga dhexe ee Soomaaliya ayaa ka dalbaday IMF in ay tixgeliso codsiga dowladda Soomaaliya, maadaama bey yiraahdaan horumar baaxad leh laga gaaray doorashooyinka dalka.

The post Xog: Murashaxiin doonaya in dib loo dhigo doorashada madaxweynaha Soomaaliya appeared first on Caasimada Online.