Sucuudiga Oo Xidhay Dad Masaajidka Nebiga Ku Dhex Caayay Wasiir

[Deeq A.]

(SLT- Madiina)-Safaaradda Sacuudi Carabiya ee Pakistan ayaa xaqiijisay in tiro dad ah oo u dhashay Pakistaan la xidhay kadib markii ay ku dhawaaqayeen hal ku dhigyo lagu tilmaamay ‘aflagaado’ xilli ay ku sugnaayeen masaajidka Nebiga ee ku yaalla magaalada Madiina.

Khamiistii ayay aheyd markii dad badan oo kasoo jeedo Pakistaan ay ku dhawaaqayeen erayo siyaasadeed iyo aflagaado markii uu raysal Wasaaraha cusub ee Pakistaan, Shahbaz Sharif uu gaadhay Masaajidka Nabiga isaga iyo wafti uu horkacayay kuwaas oo salaadda ku tukanayay halkaas.

Waxaa soo baxayay warar sheegaya in mas’uuliyiinta Sacuudiga ay xabsiga dhigeen qaar ka mid ah dad Pakistaaniyiin ah, balse warbaahinta Pakistaan ayaa Jimcihii soo xigtay saraakiil ka tirsan safaaradda Sacuudiga oo sheegay in dadka qaar ay ku dhawaaqayeen halku dhigyo ‘Caay ah’ xilli ay ku tukanayeen masaajidka Nabiga. waxaana xabsiyada loo taxaabay dadkii lagu eedeeyay arrintaas.

Safaaradda Pakistan ee Sacuudiga ayaa waxay sheegtay in warkaas aan la xaqiijin.

Safaaradda Pakistaan ee Sucuudiga waxay intaa ku dartay in haddii uu jiri lahaa warkan ay maalintii ugu horreysay ee dhacdada ay baahin laheyd wakaaladda wararka ee dowladda Sucuudiga.

Sakaullah Mohsin oo ah wariye ka tirsan wafdiga Ra’iisul wasaaraha Pakistan ayaa BBC-da u sheegay in Ra’iisul wasaare Shahbaz Sharif iyo wafdigiisa markii ay soo gaadheen masaajidka Nebiga ay halkaasi isugu soo baxeen dadweyne aad u fara badan kadib markii ay la kulmeen wasiirka warfaafinta Maryam Aurangzeb, Waxay dadka ku qeylinayeen ‘tuug’ .

Dadkii joogay masaajidka Nebiga ayaa weeraray wasiirka, waxaana usoo gurmday Shah Zain Bugti oo ka mid ahaa wafdiga Ra’iisul Wasaaraha Pakistaan, dadka qaar ayaa la arkayay iyagoo timaha jiidaya halka qaarkood ay dharbaaxeen wasiirka Warfaafinta Pakistan Maryan oo kamid aheyd wafdiga Ra’iisul Wasaaraha ku wehlinayay Sucuudiga.

Arrintan ayaa buuq ka dhex dhalisay halkaas iyadoo kumanaan qof oo ku sugnaa masaajidka nebiga ay xaaladda faraha lasoo galeen.

Tehreek-e-Insaf oo ka tirsan xisbigii hore ee ka talin jiray Pakistan ayaa bartiisa Twitter-ka ku sheegay in tallaabadan ay tahay gadood shacab.

Wasiirkii hore ee xuquuqul insaanka Pakistan, Shirin Mazari ayaa fariin uu soo dhigay Twitter-ka ku yidhi, “Dambiilayaasha ka tirsan dowladda dibadda laga keenay ee ku timid shirqoolka Mareykanka ayaa dhibaato badan kala kulantay magaalada Madina, meel kasta oo ay tegaan Pakistaniyiintu kama hadhi doonaan”

Waxaa la arkayay muuqaallo ku saabsan dhacdadan inkasta oo wasiirka warfaafinta Pakistan ayna weli ka hadlin.

Source