AYOUB Posted June 30, 2006 Ummad waliba waxay leedahay geesiyaal caan ka ah bulshada dhexdeeda. Balse waxaad mooddaa in bulshada soomaalidu ay ka simantahay inaanay geesiyaashooda xusin oo soo hadalqaadin inta ay noolyihiin. Waxa jira geesiyaal farabadan oo maanta nool. Abwaan Axmed Ismaciil Diiriye "Qaasim" Wuxuu ka midyahay geesiyaasha caanka ah ee maanta nool. Qaasim waa nin abwaan ah, balse abwaanimadiisu maaha oo keliya inuu tiriyo maanso quruxbadan ee maansooyinkiisu waxay xanbaarsanyihiin dareen shacbi oo dhab ah. Wuxuu sawir ka bixinayaa dareenka dadka iyo qallooca jira iyo weliba sida looga baxayo. Dhanka kale qaabka iyo habdhaca maansooyinkiisu waa kuwo aad odhan karto waxay si farshaxxanimo ku dheehantahay u gelayaan maanka qofka. bal aynu soo qaadano gabayga la magacbaxay "Macaan iyo qadhaah, baydadkiisa hore. Dacartuba marbay malab dhashaa muudsataa dhabaqe Waxan ahay macaan iyo qadhaadh meel ku wadayaalle Midig-tayda iyo bidixday-du waa laba mataanoode Midi waa martida soora iyo maata daadihise Midina waa mindiyo xiirayiyo mur iyo deebaaqe Masalooyin talantaalliyaan maandhow leeyahaye. Macaan iyo qadhaadh oo uu naftiisa kaga hadlayey, haddaynu dhaafno aynu milicsanno halgankii iyo dareenkii uu u soo gudbiyey bulshada. Waxaan ku bilaabayaa maansada la magacbaxday "Farriin". Maansadaa wuxuu tiriyey 26 June 1960. Wuxuu dareenkiisa gaadhsiinayaa bulshada, isagoo ku soo halqabsanaya Maxamed Cabdulle Xasan. Waxaana ka mid ahaa gabaygaas: "Aloow yaa darwiishkii, farriin debécsan gaadhsiiya. Aloow yaa dadkaagii yidhaa, dawladnimo qaaday, Aloow yaa dabbaaldeg iyo faras kala dul eedaama. Aloow yaa duleedada Taleex uga damaashaada" . Dareenkaas wadaninimo, ee soomaalinimadu ku dheehnayd waxa dilay oo bedelay maamulkii u kala danbeeyey Jamhuuriyaddii soomaaliyeed. Gaar ahaan maamulkii keligii taliyihii muddada dheer dalka ka talinayey. Mar uu Qaasim ka hadlayey dhibkii soo gaadhay bulshadii reer Somaliland oo uu si gaar ah uga hadlay Hargeysa ayuu maanso la yidhaahdo Hargeysa ka tiriyey 1984-kii wuxuuna yidhi: Hargeysaay anaa kaa hurdee laguma haysteene Halaq iyo abees kuma gam'een hadhacyadaadiiye Huluulaha col kuuguma jireen soo hamaamsadaye Hantidaada muu weerareen halaq wax-boobaaye Carruurtiyo haweenkaad lahayd lama halgaadeene Hadhaa laguma sheegeen raggii noo horrayn jiraye Hoos looma eegeen kuwii hawl-karka ahaaye Hoosaasiyaal uma shireen horumarkaagiiye Hootada afaysani boqnaha igama heerteene Dhammaan hoobaladii may-qaxeen hibadu saarrayde Hayeeshee habeen guule-baad heli habeen dhowe Had' aan sii fogayn waxaad fishaa heego iyo roobe Hillaac caafimaad baa ku mari hogol daruureede Heeryada ragbaa kaaga furi hub iyo baaruude Hor ilaahay waan kaa xorayn hawsha kuu timiye Insha'llah hoy nabad gelyaa lagugu soo hoyne. Gabaygaa Qaasim wuxuu tiriyey 1984. Waxaad u fiirsataa farxaddii 1960 ee uu ku farxay calankii ugu horreeyey ee dhul soomaaliyeed laga taago iyo dareenka maansada Hargeysa oo uu tiriyey 24 sannadood ka dib. Labada maansoba waxay taabanayaan dareenkii markaa jiray. Kamuu gabban ee wuu toogtay labada jeerba. Maansada "Mugdi" oo uu abwaanku tiriyey 1964-kii bal aynu eegno dareenkii xilligaa jiray iyo sida uu uga hadlayo. Farshaxannimada heerka sare ah ee uu abwaanku adeegsaday bal si dhugmo leh u eeg oo dhuux qaabka uu u sawirayo iyo dareenka uu gudbinayo. Tusaalayaasha uu soo qaadanayo ayaa ah kuwo inoo caddaynaya miisaanka gabayga iyo macnaha uu xanbaarsanyahay. Mugdibaan ka gacan haadiyaa Maxamed Kaydoowe Geelbaan maqaarkaw sidaa midi ka dhiiqayne Soomaali midab doorsantay-baan meeday leeyahaye Murti samada lagu laalaybaan muhindisaayaaye Dad musbaar dhegaha kaga jiraan maqal ka tuugaaye Mawdkii adoogay dilay-baan meel dhow ka arkaaye Mindidii boqnaha iga jartaa madaxa ii taale Noloshuba macaan maleh haddanad magac ka reebayne. Lasoco qaybta labaad. Qore: Sayid Maxamed Yusuf "Dhegey" Sweden/Stockholm Quote Share this post Link to post Share on other sites
AYOUB Posted June 30, 2006 Milicsiga maansooyinkii Abwaan Qaasim Dayaxaa la kala boobayaa iyo dirirkii cawleede Xiddigtii dagaariyo la dhaaf diillintii Guray'e Dibbaa laxaha loo eegayaa sacana waa daafe Duqii samada lagu sheegayiyo dide cirjiidhiiye Dabaylaha ragbaa kala yaqaan dawga loo maro'e Hadba waqalka dihin Ruushku waw-doogsin cararaaye Daruuraha la weeraray nin ogi dib uga faallooye U fiirso tusaalayaasha runta ah ee uu abwaanku inna tusinayo. Wuxuu dadka u sheegayaa 1964-kii in Ruushku samada u socdo, in rag badan oo kalena ay xiddiga higsanayaan. Waxaynu xasuusannahay "Dagaalkii xidigaha" ee siddeetamaadkii dhexmaray Ruushka iyo Maraykanka. Hadaba aragtida Abwaan, Qaasim oo xilligaa ahaa nin dhallinyaro ah, wuxuu doonayey in raggaa lala tartamo, waana guubaabo ilaa maanta nool. Intaa marka uu dhaafo ayuu qeexayaa halka isaga iyo dadkiisii ay taagan yihiin. Nin da'dii halkaa gaadhay oo daallanbaan ahaye Hayeeshee dabkeedu ha ba'ee doqoni waa mooge Daab godina sooma jarin wiilashaan diraye Halka dunida lagu geeddi yahay deyiba maayaane Umaddii daryeel weli mahelin daacadda ahaaye Sidii bay u dooyeysantahay damashii weyneyde Sidii bay duleedada dharli'i ugu dabjeexaane Sidii baa du'dada aar dhiciyo dacaw u joogaaye Sidii baa dugaag uga gurtaa daaqa xoolaha'e Sidii bay docu aqalladii uga daloolaane Sidii baa darroorimada iyo daad u gelayaaye Sidii baa degmadu ceelashii ugu darleeftaaye Sidii baa ducaaloow! biyaha loo dawariyaaye Sidii bay u daba goosi tahay haradii Dooloode Oo weliba dibindaabyo-iyo diriri joogtaaye Waakaa dareersaday Axmaar dayr cadkii dhalaye Danbi ku hadli maayo'e ma'arag dawladdaan rabaye Isma doorin gaalkaan diriyo daarta kii galaye Dusha midabka soomaalibaad dugulka mooddaaye Misna laguma diirsade qalbigu waadirkii Karal'e Meeshaan dad aan urursho iyo darar ka eegaayey Iyaba waa darxumo ii hadhaye dacar miyaan leefay Ma dorraato raadkaan dhigaan dib ugu soo laabtay Sidii aan deyeysanahay miyaan dawgii ka habaabay Waxba hadalku yuu iladurkine waxan ku soo duubay Mar uunbuu dafsoo odhan nabsigii diinku soo sidaye Mar uunbay daruur caafimaad dooxa soo rogiye Dirridaa abaarta ah marbaa doog kasoo bixiye Dibjirkiyo reer miyigu marbay daasadaa qubiye Mar uunbuu digiigixan raggii daalanaan jiraye Dibnihii shakaallaa marbaa dooda loo furiye Markaasaa la daydayan xaqii naga dahsoonaaye. Abwaan, Axmed Ismaaciil Diiriye "Qaasim" wuxuu gabaygaa ku sheegay meesha dunidu ku socoto iyo halka aynu xilligaa taagnayn (42sannadood dabadeed weli halkii baynu joognaa). Abwaanku muu rajo dhigin ee wuxuu gabayga ku soo gunaanaday rajo wanaagsan. Ilaa maantana rajadaas baynu qabnaa. Sannadihii lixdamaadkii ayuu Qaasim si aad u qiimo badan u soo gudbiyey gabayo aan ilaa maanta qaar u dhigma lahayn. Sida gabayga kor ku xusan oo kale waa gabay, bixinaya cashar oo aad ka dhex arkayso ujeedada oo dhan. Hadii ay dhalliil tahay, haddii ay wax-sheegtahay iyo inaan la quusan. Waxaan ku soo afmeerayaa milicsigii maansooyinka Abwaan Qaasim Gabaygan hoosta ku qoran oo uu abwaanku curiyey 1960kii, waana maanso la magacbaxday "Gobaad". Hashaan gaaxinayaan lahaa gorofka way buuxin Geyaxa hashaan kaga xidhxidhay gabantii nuugaysay Geedkii magoolaba hashaan uga garaacaayey Gaaroodi iyo Hawd hashii laba gardaaqaysay Wax-layidhi haddaa goodirkii lagu gabraartaaye Waxla yidhi golbaa lagu dabraa geed-waraabe leh'e Wax-layidhi gujaa lagu lisaa labada gooroode Wax-la yidhi gal daayeer cabbaa habari geysaaye Golqaniinna waa loogu daraa yaanay gaagixine Wax-layidhi gomode naasihii giigsanaan jiraye Gobaad waxay la daaqdaa sagaal goroyocaw-loode Googooye! iyo wiil xunbaa gaawahaw sido'e Wallee ama gumooboo sidaa layga gallad haysay Walle ama rag ways gaadayaa gacan ku ciil beelay. Waxa hubaal ah in dhallinyaro badan oo maanta joogta, haddii ay gabayadaa akhriyaan aanay waxba ka fahmaynin. Waa ayaan darro oo afkaagii iyo sarbeebtaadii afkaagu lahaa oo aad garan weydaa waa nacasnimo. Xataa dad badan oo aan ku korin qurbaha oo maanta dalkii hooyo ku sagan ayaan garanayn ujeedada iyo macnaha gabayadaasi xanbaarsanyihiin. Hasha uu Qaasim ka hadlayaa waa tee. Gobaad waa tuma. Neefkan geela ah ee darxumada ku nool ee uu abwaanka u doodayaa waa maxay. Runtii abwaan Qaasim qaabka uu u dhigayo gabayadiisu waa mid soo jiidanaysa dareenka qofka fahmaya. Abwaan Axmed Ismaaciil Diiriye "Qaasim" wuxuu innaga mudanyahay billad geesi. Wuxuu innaga mudanyahay in la qoro maansooyin-kiisii oo si qoto dheer loo qeexo erayada adag ee ku jira gabayada. In ujeedada maansadu xanbaarsantahay la dooxo oo sharraxaad qofkastaaba fahmi karo lagu qoro. Dhammaad. Qore: Sayid Maxamed Yusuf "Dhegey" gacanlibaax2001@yahoo.com Jamhuuriya Online Quote Share this post Link to post Share on other sites
AYOUB Posted August 15, 2006 Sun, 13 Aug 2006 00:00:00 -0700 Baroordiiq (Tacsi) Abwaan Axmed Ismaaciil “Qaasin†Baroordiiq (Tacsi) Abwaan Axmed Ismaaciil “Qaasin†Inaali laahi wa inaa ileyhi raajicuun Hawl-wadeennada Ururka dhaqanka, afka iyo Suugaanta ee Aftahan Org, waxa ay tacsi u dirayaan dhammaan ehelkii, qaraabadii, asxaabtii iyo idil ahaan bah-weynta curshaaga iyo hal-abuurka af soomaaliga ku hadla, iyagoo uga tacsiyadeynaya geerida ku timid Alle ha u naxariistee - abwaan Axmed Ismaaciil Diiriye (Qaasin) oo Sabtidii 12/08/06 ku geeriyoodey magaalada Hargeysa. Qaasin alle ha u raxariistee waxa uu ka mid ahaa buuni ay tixdiisu carceertay oo ka caanbaxay dhulalka ay soomaalidu degto. afsoomaaliga laga hadlo, ruug-caddaaga hal-abuurka casriga ah ee soomaalida. Qaasin wuxuu ahaa maansayahan Ilaahay hibo u siiyey curinta maanso xigmad iyo miisaan leh oo hal-hays iyo hal-ku-dhig ba noqotay “Waxaan ahay qadhaadh iyo macaan meel ku wada yaalâ€. Taariikhda ayaa xusi doonta kaalinta uu kaga jirey halgankii gobanimo-doonka iyo kii caddaalad-doonkaba iyo quruxda farshaxanimo ee ay maansadiisu xambaarsanayd, iyo sida uu dareenka bulsho uga turjumi jirey. Ilaahay naxariistii janno ha ka waraabiyo. Waxaan shaki ku jirin in maansooleydii soomaalida maalinba mid iilanayo oo Alle oofsanayo, xaqiina ku soo degayo. Waxayse is weydiintu tahay; sidee looga faa’iidaystay ama intee in le’eg oo murti iyo maanso ah ayaa lagala hadhay? Waxa kale oo yaab leh, sida joogtada ah ee ay isugu xig xigaan. Waxa saddexdii sanno ee ugu dambeeyey geeriyoodey, Jaamac-gacmadheere, Yuusuf X. Aadan, Ibraahin-gadhle, Yamyam iyo Qaasin. Kolley anagoon (Aftahan ahaan) canaan badan ku lahayn, haddana annagaa uga calaacal dhow kuwo badan oo aan dareensanayn, kaalinta Abwaanka iyo aqoonyahanku kaga jiraan horumarinta afka iyo hiddaha. Abwaan Qaasin –Kaah damay; Alle ha u naxariisto, samir iyo iimaanna ha inaga wada siiyo. Aammiin. Allaa mahad leh AFTAHAN ORG (www.aftahan.com) Mahadhadii Abwaan Axmed Ismaaciil Diiriye "Qaasin" Quote Share this post Link to post Share on other sites
Jaylaani Posted November 22, 2006 Simply the best. Quote Share this post Link to post Share on other sites
