Vladimir Putin oo qaaday Tallaabo ay Reer Galbeedka uga digeen

[Deeq A.]

 Vladimir Putin oo qaaday Tallaabo ay Reer Galbeedka uga digeen

Madaxa guddiga Yurub Ursula von der Leyen ayaa sheegtay in “xilligii shidaalka iyo saliidda Ruushka ee uu Yurub ku gumeysanayay” uu sii dhamaanayo.

Hadalkeeda ayaa ku soo beegmaya ka dib markii shirkadda tamarta Ruushka ee Gazprom ay sheegtay in ay joojisay gaaskii ay u dhoofin jirtay Poland iyo Bulgaria.

Hogamiyayasha siyaasada ee Warsaw iyo Sofia ayaa sheegay in talaabada Moscow ay la macno tahay “Mugdi”.

Afhayeenka Kremlin-ka Dmitry Peskov ayaa ku adkeystay in Moscow ay weli tahay dal tamar la isku halayn karo, wuxuuna sheegay in Ruushka tallaabada uu qaaday ay ku khasbeen waddamada reer Galbeedka.

Laakiin wasiir ku xigeenka arrimaha dibadda Poland, Marcin Przydacz, ayaa BBC u sheegay in Ruushku uu doonayo in uu “kala qaybiyo” ka dhex abuuro xulafada reer galbeedka.

Joojinta shirkadda Gazprom ayaa ka dambeysay kadib markii Poland iyo Bulgaria ay diideen inay ku bixiyaan gaaska lacagta Ruushka ee Rubles.

Bishii hore, madaxweynaha Ruushka Vladimir Putin ayaa go’aamiyay in dhammaan lacagaha tamarta lagu bixiyo lacagta Ruushka.

Talaabadan oo loogu talo galay in lagu soo xoojiyo lacagta sii liicaysa ee ay cunaqabataynta reer galbeedku ku soo rogeen, ayaa waxa si adag uga hortagay wadamada reer Yurub.

Bayaan ay maanta soo saartay, shirkadda Gazprom waxay ku sheegtay inay “gebi ahaanba hakisay gaaska ay siin jirtay Poland iyo Bulgaria” iyadoo la tixraacayo wareegtada uu soo saaray Mr Putin.

Shirkadda gaaska ee dawladda Poland ee PGNiG ayaa xaqiijisay in Gazprom sahaydii ay u keeni jirtay dalka la joojiyay waxayna ka digtay inay “xaq u leedahay inay magdhow raadsato” ayna isticmaali doonto “dhammaan cadeymaha qandaraasyadii ay galeen “.

Madaxweynaha Poland Andrzej Duda ayaa sheegay in “tallaabooyin sharci ah oo ku habboon” laga qaadi doono shirkadda Gazprom.

PGNiG waxay iibsatay 53% gaaska Gazprom 3-dii bilood ee hore ee sanadkan, laakiin Warsaw waxay sheegtay inay gaas ka heli karto ilo kale.

Raiisel wasaare ku xigeenka UK Dominic Raab ayaa TV-ga Ingiriiska ee Sky News ka sheegay in go’aanka lagu jarayo sahayda gaaska ay “saameyn aad u xun ku yeelan doonto Ruushka”.

Waxa uu intaa ku daray in ay sii go’doomi doonto Ruushka oo ay u horseedi doonto in uu noqdo “dal dhaqaalihiisu dhulka galo”.

Kahor ku dhawaaqista shirkadda Gazprom, madaxa shaqaalaha ee madaxweynaha Ukraine Volodymyr Zelensky ayaa ku eedeeyay Ruushka “inuu bilaabay dagaalkiisii gaaska ee Yurub”.

Andriy Yermak waxa uu sheegay in Moscow ay raadinaysay inay u isticmaasho agabka tamarta sida “hubka” waxa uuna ugu baaqay Midowga Yurub inay “cunaqabatayn ku soo rogaan kheyraadka tamarta”.

Yurub waxay ku tiirsan tahay Ruushka in ka badan saddex meelood meel baahideeda gaaska.

Qaran News