Sida Madaxweyne Farmaajo ugu dadaalayo helista codadka ugu badan ee xildhibaannada

[Deeq A.]

Muqdisho (Wararka PP) — Doorashada Madaxweynaha Soomaaliya ayaa foodda inagu soo haysa. Haddii uu Cabdirashiid Xiddig guuleysto ama haddii uu guuldarraysto wax isbeddel ah kuma dhacayo murrashaxnimada Madaxweyne Maxamed Cabdullaahi Farmaajo. Xiddig wuxuu lama-filaan ku noqday Madaxweynaha Puntland Siciid Cabdullaahi Deni oo dhiggiisa Jubaland, Axmed Madoobe, ka filayay inuu hor istaago isa soo sharrixidda Xiddig, oo hadduu noqdo Guddoomiye Baarlamaan keeni kara in Deni waayo fursadda uu ku noqon karo Ra’iisal Wasaare haddii isaga iyo Farmaajo laga guuleysto.

Himilada Xiddig waxaa hor istaagi kara tartame ka socda beelaha kale. Isa soo sharrixidda Xiddig waa u fursad Madaxweyne Farmaajo oo bartilmaameed u ah Deni waayo Madaxweynaha Puntland wuxuu ololihiisa ku qoobxiray dhaqdhaqaaq xilka lagaga qaadayo Madaxweyne Farmaajo. Codadka seddex beelood (aan ahayn beelaha isu dhiibka siyaasadeed ku soo jiray) badankood, oo 60% ah, ayuu Farmaajo ku dadaalayaa inuu helo. Waxqabadkiisii shantii sano ee la soo dhaafay ayaa u ah barnaamij siyaasadeed dadban.

Madaxweyne Farmaajo wuxuu la tartamayaa laba madaxweyne hore iyo murrashixiin kale.

Madaxweyne Farmaajo wuxuu sameeyay isbahaysi xubnahiisu arkeen inay codkooda ku heli karaan muuqasho siyaasadeed. Fursadaha shaqada iyo dhaqaalaha ay heleen seddexda beelood aan ilaa hadda ku kaltamin labada xafiis ee fulinta way kordheen marka la barbardhigo fursadaha ay heleen muddo xileedkii Madaxweyne Xasan Sheekh Maxamuud iyo Madaxweyne Shariif Sheekh Axmed.

Labada Madaxweyne hore waxay Jubaland iyo Puntland u arkaan bahwadaag siyaasadeed, ka sokow ka kala mid ahaanshaha laba qowlaysato siyaadadeed — Damuljadiid iyo Aala Sheekh. Haddii midkood uu talada ku soo noqdo shaqada ugu horreysa uu ku dhaqaaqayo waa kala dhantaalidda isbahaysiga siyaasadeed uu Madaxweyne Farmaajo sameeyay iyo maamullada aad ugu dhow isaga — Hirshabeelle, Galmudug iyo Koonfur Galbeed.

Rajadii dad badan sida Jeneraal Indhacadde iyo Cabdikariim Guuleed ay qabeen oo ah in laga reebo Madaxweyne Farmaajo tartanka way sii yaraatay. Maxay Xasan Sheekh iyo Sheekh Shariif u soo bandhigi karaan beelaha metelaaddoodu sare u kacday shantii sano ee la soo dhaafay? Labadoodu midna ma laha ku tiirsanaan la’aanta cudud beeleed oo uu Farmaajo ku caanbaxay. Ra’iisal Wasaarihii hore Xasan Cali Kheyre ayaa Sheekh Shariif iyo Xasan Sheekh kaga dhow beelaha uu Farmaajo isku hallaynayo inkastoo Kheyre ka mid yahay Midowga Murrashixiinta.

Madaxweyne Farmaajo wuxuu ku tartamayaa barnaamij siyaasadeed ku duulaya baalasha fursadihii siyaasadeed iyo dhaqaale uu u abuuray beelo ku dulmanaa awood-qeybsiga. Beelahaasi ma doonayaan inay ku noqdaan muuqasho la’aantii siyaasadeed. Damuljadiid iyo Aala Sheekh waxay aad ugu tashanayeen Deni oo si lama-filaan ah ugu soo biiray murrashixiinta u tartamaysa guriga Soomaaliya looga taliyo. Dhisidda ciidammada, tirtiridda mushaarradii la siin jiray askarta aan jirin iyo shaqaalaha rayidka dhowrka magac ku mushaarqaadan jiray ayaa ah guulo siyaasadeed oo uu Madaxweyne Farmaajo sheegan karo.

Madaxweyne Farmaajo wuxuu taageerayaa hab federaal aan wiiqayn awoodda dowladda dhexe, halka Madaxweynaha Puntland u xusulduubayo dhidabbo u aasidda hab federaal awooddiisu ay maamul federaaleedyadu dheelli-tirayaan. Wuu ku guuleystay wajiga kowaad ee barnaamijkiisa siyaasadda: waa hoggaamiyaha keliya oo si toos ah ula soo baxay xildhibaannada iyo senatarrada lagu doortay Puntland sanadkan, inkastuu gebi ahaanba wiiqay geeddi-socodka dimuqraaddiyeynta kaddib doorashooyinkii tijaabada ahayd ee dowladaha hoose. Waa iimo siyaasadeed uu Madaxweyne Farmaajo ka faa’iideysan karo.

© Puntland Post, 2022

The post Sida Madaxweyne Farmaajo ugu dadaalayo helista codadka ugu badan ee xildhibaannada appeared first on Puntland Post.