Dagaalka Ukraine: Maxay Ruushka isaga baxeen warshadda nukliyeerka ee Chernobyl?

[Deeq A.]

XIGASHADA SAWIRKA,GETTY IMAGES

Qoraalka sawirka,Tan iyo markii uu Ruushku halkan qabsaday waxaa walaac laga muujinayay badqabka warshadan hore

Ciidammadii Ruushka ee haystay warsaddii hore ee laga dhalin jiray quwadda nukliyeerka ee Chernobyl ayaa halkaas isaga baxay, sida ay sheegeen shaqaalaha warshaddaasi.

Sida ay tibaaxday shirkadda qaranka ee nukliyeerka Ukraine ee Energoatom, shaqaalaha ku sugan warshadda ayaa sheegay in haatan aanay jirin “cid iyaga ka baxsan” oo goobtaasi ku sugan.

Goor sii horraysay, shirkadda waxa ay sheegtay in ciidammada Ruushka ay u ruqaansadeen xadka Belarus, iyagoo halkaas uga tagay koox yar.

Ku dhawaaqista ayaa u muuqata mid lagu xaqiijinayo warar ay sheegeen saraakiil sarsare oo ka tirsan gaashaandhigga Mareykanka kuwaas oo Arbacadii sheegay in goobtaas uu Ruushku isaga baxayo.

Ciidammada Ruushka ayaa waxa ay Chernobyl qabsadeen bilowgii duullaanka ay ku galeen Ukraine.

“Saakadan, ayaa kooxaha xoogga ku soo galay dalka waxa ay ku dhawaaqeen inay rabaan inay isaga baxaan warshadda dhalisa quwadda nukliyeerka ee Chernobyl”, ayey Energoatom ku sheegtay bayaan ay soo saartay Khamiistii.

XIGASHADA SAWIRKA,RUSSIAN DEFENCE MINISTRY/GETTY IMAGES

Qoraalka sawirka,Ciidammada Ruushka ayaa isku gadaamay dhismaha warshadda

Shirkadda ayaa sidoo kale xaqiijisay wararka sheegaya in ciidammada Ruushka ay dhufaysyo ka qoteen qeybta ugu sunta badan ee aagga xiran ee Chernobyl, iyagoo halkaas ay ku haleeshay “doosas badan” oo shucaac ah. Waxaa jira warar aanan la xaqiijin oo sheegaya in qaar kamid ah askartii halkaas joogtay lagu dabiibay waddanka Belarus.

Wakaaladda wararka ee Reuters ayaa waxa ay shaqaalaha warshadda ku sugan ka soo xigatay inay sheegeen in qaar ka mid ah ciidammada aanay ogayn inay ku sugnaayeen aag uu ku furan yahay shucaac badan.

Sikastaba xaalku ha ahaadee, milateriga Ruushka ayaa sheegay in kaddib markii ay qabsadeen warshadda heerarka shucaaceeda laga dhigay mid caadi ah oo meeshiisa lagu xakameeyay.

Hay’adda Caalamiga ah ee Atoomikada Adduunka (IAEA) ayaa bayaan ay soo saartay ku sheegtay in aanay u suuragelin inay xaqiijiso wararkaasi.

Hasayeeshee, agaasimaha shirkaddaasi ayaa sheegay inay wadaxaajoodyo dhaw la leeyihiin mas’uuliyiinta Ukraine taas oo ay howlgal ugu dirayaan warshadda Chernobyl maalmaha soo aaddan.

Qoraalka sawirka,Chernobyl waxaa ku yaal dhowr aag oo lagu qubo wasakhda nukliyeerka taas oo sahlaysa in ay faafaan waxyaabaha shucaaca bixinaya

Maalma dhaweyd ayuu Ruushku sheegay inuu hoos u dhigi doono howlgallada uu ka wado waqooyiga Ukraine ee meelaha ku dhaw caasimadda Kyiv uuna diiradda ciidammadiisa saari doono dhanka bariga ee gobolka Donbas.

Hasayeeshee Khamiistii Xoghayaha Guud ee Nato Jens Stoltenberg ayaa sheegay in Moscow ay dib isu habaynayso oo aanay doonayn inay baxdo, iyadoo sidaas u samaynayso inay dib isugu soo abaabusho si ay u xoojiso duullaanka ay ka waddo Donbas.

“Isla markaas, Ruushku waxa uu cadaadis ku sii wadaa Kyiv iyo magaalooyin kale. Marka waxaan filanaynaa weerraro dheeraad ah oo weliba dhibaatooyin badan oo kale keeni doona,” ayuu yiri.

Waxa uuna intaasi ku daray in aanay waxba isbadelin ujeedkii Ruushka ee ahaa in awood milateri uu wax ku maquuniyo.

XIGASHADA SAWIRKA,.

Qoraalka sawirka,Xaalado adag ayaa la soo weriyay inay wajahayaan shaqaalaha Ukraine iyo ilaaladii qaranka ee warshadda korontada dhalisa

Chernobyl oo xoog lagu haystay tan iyo 24-kii Febraayo, maalintii uu bilowday duullaanka, ayaa waxaa laga muujinayay walaac ku aaddan koronto la’aan iyo dhibaato haysata shaqaalaha goobtaas, kuwaas oo qaar badan oo ka mid ah ay todobaadyo halkaas ku xayiran yihiin oo aanay gaari karin guryahooda.

Walow xaruntaasi aanay shaqaynayn ayaa haddana Chernobyl weligeed la bannayn waxa ayna weli u baahan tahay in si joogto ah loo maareeyo.

Waa goobtii lagu tilmaamay inay aheyd meeshii uu ka dhacay shilkii nukliyeer ee ugu xumaa dunida sanadku markii uu ahaa 1986.

Qaran News