Waxyaabaha sababay in Hindiya noqoto Dalka badiyaaba loo tago Arrimo caafimaad

[Deeq A.]

waxyaabaha sababay in Hindiya noqoto Dalka badiyaaba loo tago Arrimo caafimaad

Hwan Francisco Paladins, waa 56 sano jir ku nool magaalada Santiago ee dalka Mareykanka, waana injineer dhanka warshadaha ah. Wuxuu dalka Hindiya u tagay caafimaad, dhakhaatiirta dalkaas ayaa u sheegay in calamadaha lagu arkay ay tilmaamayaan in Hwan ay buro maskaxda uga taalo.

Hwan waxa uu yiri, “Waxay ahayd xilli nolosheyda aad ugu adag, nasiib wanaag waxaan haystay saaxiiibo iyo qoys heegan u ah inay i caawiyaan. Taas ayaana kalsooni badan isiisay.”

Dhakhaatiirta qalliinka ayaa u sheegay Hwan in burodiisu ay tahay mid aan caadi ahayn oo aanay sahlanayn in gabi ahaanba la qaliin lagu baabi’iyo.

Baaritaannada lagu sameeyay afarta sano ee xigtay ayaa waxay muujiyeen in cabbirka burada aysan weynayn. Waxa uu yiri, “Wax walba si wanaagsan ayay u socdeen, xitaa waan illoobay inay buro igu taalay.”

Si kastaba ha ahaatee, sanadkii 2019-kii, calaamadaha ayaa mar kale dib soo noqotay.

Bishii Noofambar 2021, wuxuu u yimid Hindiya caafimaad. Isbitaalka ayaa waxa uu ka caawiyay qorshaynta joogitaankiisa.

Hwan waxa uu yidhi, “Dhammaan arrimahan oo dhami aad bay muhiim u yihiin, kumanaan mayl ayaan u jiray, waxa ay ii ahayd waddan igu cusub, waxa kale oo aan maskaxdayda ku jiray cabsi. Luuqadda iyo dhaqanku sidoo kale way kala duwanaayeen.”

Hwan wuxuu ka mid yahay kumannaanka qof ee dalka Hindiya u yimaada caafimaad sannad kasta.

 

Intii u dhaxaysay 2016 iyo 2019, tirada bukaannada u taga Hindiya caafimaadka waxay u dhexeeyeen 430000 ilaa 700,000 oo qof.

Sanadkii 2019, waaxda dalxiiska caafimaadka ee Hindiya waxay samaysay lacag gaaraysa $9 bilyan oo doollar.

Kaalinta Hindiya ee Koonfurta Aasiya

Balse xayiraadaha safarka ee la soo rogay intii lagu jiray faafitaanka Covid-19 ayaa sababay inay yaraadan tirada dadkii caafimaadka u imaan jiray dalka Hindiya.

Marka la eego xogta Wasaaradda Dalxiiska ee Hindiya, sanadkii 2021, kaliya 183,000 ajaanib ah ayaa Hindiya u yimid caafimaad. Tiradaas waxay 73% ka yartahay tirada dadkii yimid 2019-kii.

Waddamada kale sida Thailand, Malaysia iyo Singapore, kuwaas oo caan ku ah dalxiiska caafimaadka ayaa sidoo kale waxa saameeyay xayiraadihii la xirriiray safmarka covid-19.

Dinesh Madhavan, oo ah madaxa kooxda Oncology ee International Apollo Hospital Enterprises, ayaa sheegay in Hindiya ay leedahay tirada ugu badan ee dhakhaatiirta Koonfurta Aasiya.

Waxa uu yiri, “Dhaqankeena hodanka ah iyo caafimaadka casriga ah waxay suuragelisay inay dad badan Hindiya u xushaan halka ay ku kalsoonyihiin.”

Dalxiiska caafimaadka

Badanaa dadka dibadda ka yimaada Hindiya uma tagaan oo kaliye daawaynta cudurrada halista ah sida kansarka. Tirada dadka u imanaya Hindiya qalliinka qurxinta ayaa sidoo kale sii kordhaya.

Dr. Satish Bhatia oo ku takhasusay cudurrada maqaarka oo fadhigiisu yahay magaalada Mumbai ayaa sheegay in bukaannada ay uga imaadaan Ameerika, waddamada Khaliijka iyo xitaa Afrika.

Sida laga soo xigtay Dr. Bhatia, hababka qurxinta ee ay sameeyaan ugu yaraan 50% ayaa ka jaban Yurub, Bariga Dhexe ama Afrika.

Intii uu Covid-19 jiray, dhammaan noocyada safarka ayaa la joojiyay taasi oo saamaysay dalxiiska caafimaadka.

Si kastaba ha ahaatee, Dr. Bhatia ayaa sheegay in shaqada ay si wanaagsan u socoto haatan uuna rajeynayo in mustaqbalka ay ka sii fiicnaato sidaan.

Waxaa sidoo kale jira hoos u dhac ku yimid tirada bukaannada ka imaanaya dalka dibaddiisa.

Qaar ka mid ah dadka xiriirka la leh waaxda dalxiiska caafimaadka ayaa aaminsan in haddii nidaam la sameeyo si isha loogu hayo, markaa arrimuhu way ka fiicnaan doonaan taas.

Garima Maggu, oo ah agaasimaha wakaaladda socdaalka caafimaadka ee MedSurge, ayaa sheegay, “Waxaa jirta baahi aad u daran oo dowladdu ay u qabto in ay dejiso tilmaamo, isbitaallada, bixiyeyaasha adeegga iyo qaybaha kale waa in ay raacaan si dalxiiska caafimaadka uu u noqdo mid xirfad leh.”

Mid ka mid ah dhibaatada haysata isbitaallada ayaa ah in bukaannada ay sidoo kale yimaadaan Hindiya oo ay beddelaan maskaxdooda ka dib markii wax walba lagu hagaajiyo hal isbitaal ka dibna ay tagaan isbitaal kale oo daaweyntu ay ka sii jaban tahay. Tani waxay lumisaa wakhtiga iyo agabka isbitaallada.

Maggu wuxuu sheegay in haddii dawladdu ay hagaajiso qiyaasta daaweynta, markaa dhibaatadan si fudud ayaa loo xalin karaa.

Isla markaana, Hwan, oo hadda ku nool Santiago, ayaa sheegay inuu ku faraxsanyahay daawaynta loo sameeyay.

“Caafimaadkaygu hadda waa aad ayuu u wanaagsan yahay.” Ayuu yiri.

Qaran News