Turkiga Oo Dalkiisa U Fasaxay Maal-qabeenada Ruushka Ee Reer Galbeedku Beegsanaayo

[Deeq A.]

(SLT-Doha)-Wasiirka Arrimaha Dibedda Turkey Mevlut Cavusoglu ayaa sheegay in maal-qabeenada Ruushka ee loo yaqaan Oligarchs ay sii wadi karaan inay ganacsiyo ka sameeyaan Turkey inta ay ilaalinayaan sharciga dalka iyo kan caalamiga ah.

Cavusoglu oo la weydiiyey haddii maal-qabeenada Ruushka ee waajahaya cunaqabataynada Reer Galbeedka ay ka ganacsan karaan Turkey.

“Dabcan, haddii ay tahay sharci, haddii ayna ka hor imaneyn sharciga caalamiga ah. Waan ka fakari doonnaa,” ayuu yidhi.

“Haddii ay ka hor-imaneyso sharciga caalamiga ah, taasi waa sheeko kale.”

Laba ka mid ah doomaha raaxada ah oo uu leeyahay bilyaneerka Ruushka ee Roman Abramovich ayaa toddobaadkan ku xidhay dalka Turkey.

Mar waxa laga weydiiyey xaaladdooda, ayaa wasiirka wuxuu sheegay in Turkey ay fulisay cunaqabataynada ay asixisay Qaramada Midoobay.

Tallaabooyinka lagu beegsanayo hantida maal-qabeenada Ruushka ma ansixin Qaramada Midoobay balse waxaa soo rogay dalalka Reer Galbeedka, oo ay ku jiraan Mareykanka iyo kuwa xubno ka ah Midowga Yurub.

Waxay soo rogeen tallaabooyin aan hore loo arag oo ka dhan ah Ruushka, sababo la xidhiidha duulaanka ay ku qaaday Ukraine, waxaana ka mid ah in liiska cunaqabataynada lagu daro maal-qabeenada iyo shaqsiyaadka ku dhow Putin.

Dhowr dal ayaa la wareegay doomo lagu raaxeysto oo ay leeyihiin maal-qabeenada Ruushka, ayada oo madaxweynaha Mareykanka oo ka digay in xulufada ay u iman doonta “hantida aad sida sharci-darrada ah ku hesheen.”

Hase yeeshee Turkey oo xubin ka ah NATO, islamarkaana xidhiidh xooggan la leh Russia iyo Ukraine, kuma biirin dalalka Reer Galbeedka ee beegsanaya Moscow.

Source