Cabdiraxmaan Odowaa oo shaaciyey guul mucaaradka uga soo hoyatay Galmudug

[Deeq A.]

Gaalkacyo (Caasimada Online) – Wasiirkii hore ee arrimaha gudaha Cabdiraxmaan Maxamed Xuseen Odowaa oo markale dib loogu doortay Golaha Shacabka ayaa boggaadiyey doorashooyinkii lagu soo gabagabeeyey Dhuusamarabeeb iyo Gaalkacyo.

Odowaa oo ka hadlay munaasabad loo qabtay xildhibaanada la doortay oo uu isugu ku jiro ayaa shaaca ka qaaday in dowlad goboleedka Galmudug ay tahay meesha kaliya ee laga soo saaray xubno la ogyahay in ka tirsan yihiin dhanka mucaaradka Soomaaliya.

“Dowlad goboleedka Galmudug waa meesha kaliya oo mucaaradka calamadoodii la yaqaanay laga soo saaray, aniga ayaana kow ka ah,” ayuu yiri Odowaa

Sidoo kale wuxuu raaciyey “Waxaa asal ka ah aan isleeyahay reer Mudugnimada ruuxdeeda qayb ka ah is ogolaasho ayey ku saleysan tahay is aqoonsi ayey ku saleysan tahay,”.

Dhinaca kale wuxuu tilmaamay in dowlad goboleedyada kale, gaar ahaan kuwa muxaafidka ah aysan soo saarin qof mucaarad ah, halka kuwa kale ee mucaaradka ahna aysan soo saarin qof muxaafid ah, sida uu hadalka u dhigay.

“Dowlad goboleeedyo badan ayaa jira dalka dowlad goboleedyana muxaafid ayey ahaayeen kuwana mucaarad ayey ahaayeen horta dowlad goboleedyada mucaaradka qof muxaafid ah lagama soo saarin, haddii uu xittaa waxqabad fiicnaa, dowlad goboleedyadii muxaafidka ahaa ee madaxweyne Axmed Kaariye saaxibka la’ahaa iyagana wax mucaarad ah lagama soo saarin qoortaa laga jar,” ayuu markale yiri wasiir hore ee arrimaha gudaha Soomaaliya.

Hadalkan ayaa kusoo aadayo, iyada oo Galmudug ay soo gabagabeysay doorashadii Golaha Shacabka, waxaana xubnaha soo baxay ka mid ah siyaasiga Cabdiraxmaan Cabdishakuur, Cabdiraxmaan Odowaa iyo Mahad Salaad oo ka mid ah xubnaha firfircoon ee mucaaradka.

The post Cabdiraxmaan Odowaa oo shaaciyey guul mucaaradka uga soo hoyatay Galmudug appeared first on Caasimada Online.