Maamul goboleedkii ugu horeeyey oo dhaqangeliyey jadwalka doorashooyinka

[Deeq A.]

Baydhabo (Caasimada Online) – Guddiga SEIT ee Koonfur Galbeed ayaa soo saaray jadwalka doorashada todobadii kursi ee u dambeysay guud ahaan xubnaha Golaha Shacabka, gaar ahaan kuwa deegaan doorashadooda ay tahay Baydhabo iyo Baraawe.

Guddiga ayaa sheegay in isla maanta la shaacinayo guddiyada soo xulaya ergada todobada kursi oo kala ah HOP#204, HOP#197, HOP#179, HOP#172, HOP#164, HOP#181 & HOP#047.

Qoraalka ayaa sidoo kale lagu shaaciyey in diwaangelinta la bilaabayo 14-ka bishan, kadibna maalinta ee 15-ka March la qaban doonto doorashada xubnahaasi.

Tani ayaa ka dhigan in Koonfur Galbeed ay noqotay maamul goboleedka ugu horreeyey oo dhaqangeliya jadwalkii u dambeeyey ee doorashooyinka dalka oo ahaa in gabi doorashada xubnaha baarlamaanka Soomaaliya lagu soo gabagabeeyo 15-ka bishaan Maarso.

Illaa iyo hadda waxaa socda caga jiid ku aadan doorashooyinka, waxaana ugu daran muranka weli ka taagan doorashada ka dhaceysa magaalada Garbahaarey.

Horey waxaa magaalada Muqdisho loogu soo gabagabeeyo doorashooyinka kuraasta gobollada waqooyi iyo kuwa beelaha Banaadiriga, waxaana kusoo xiga Koonfur Galbeed.

Doorashada oo qaadatay muddo ka badan 1 sano ayaa haatan mareysa meel wanaagsan, iyadoo la guda-galayo doorashada guddoonka labada aqal iyo mida madaxweynaha.

The post Maamul goboleedkii ugu horeeyey oo dhaqangeliyey jadwalka doorashooyinka appeared first on Caasimada Online.