Saraakiil sare oo Mareykan ah oo Joe Biden u gudbiyey codsi ku saabsan Soomaaliya

[Deeq A.]

Washington (Caasimada Online) – Wasaaradda Gaashaandhiga Mareykanka ee Pentagon-ka ayaa doonaysa in Madaxweyne Joe Biden uu saxiixo ogolaanshaha inuu dhowr boqol oo askari oo ka tirsan ciidamada gaarka ah u diro Soomaaliya, si ay gacan uga geystaan ​​joojinta faafitaanka kooxda argagixisada ah ee Al-Shabaab ee xiriirka la leh Al-Qaacida, sida uu daabacay The Wall Street Journal.

Taliyeyaasha Pentagon-ka ayaa doonaya in Biden uu ka noqdo amarada uu bixiyay madaxweyne Trump maalmihiisii ​​ugu dambeeyay ee xafiiska, markii uu amray ku dhawaad ​​700 oo askari ee gaarka ah “Army Green Berets, Navy SEALs iyo Marine Raiders” inay ka baxaan saldhigyada Soomaaliya, sida ay saraakiisha maamulka u sheegeen jariirada.

Ciidamada Kumaandooska oo tababaro siin jiray ciidamada dowladda Soomaaliya si ay isaga difaacaan Al-Shabaab ayaa inta badan loo raray Jabuuti iyo Kenya. Hadda ciidamada Mareykanka ayaa doonaya in Aqalka Cad ee looga arrimiyo dalka Mareykanka uu dib ugu soo raro ciidamadaas, sida ay saraakiishu sheegeen.

“Tan iyo markii ciidamada Mareykanka ay ka soo baxeen Soomaaliya bishii Janaayo ee la soo dhaafay, waxaan qiimeyneynaa inuu sare u kac ku yimid dhaq-dhaqaaqyada al-Shabaab, maadaama aysan kooxdu la kulmin wax cadaadis ah oo hadda jira oo ay haystaan ​​xornimada dhaqdhaqaaqa,” sarkaal sare oo ka tirsan sirdoonka Mareykanka ayaa u sheegay warbaahinta.

“Haddii aysan sii jiri doonin cadaadis la saarayo [al-Shabaab], welwelku wuxuu noqon inay khatar ku noqdaan Soomaaliya iyo guud ahaan gobolka.”

Howlgallada ka dhanka ah argagixisada ee ciidamada Mareykanka ayaa ku fiday caalamka 20-kii sano ee ugu dambeeyay tan iyo markii Mareykanka uu duulaanka ku qaaday dalka Afgaanistaan, iyadoo ciidamada ay beegsadeen Al-Qaacida, xulafadeeda iyo markii dambe, oo ururka Daacish meel kasta oo ay joogaan kula diriray sida Ciraaq, Suuriya, Liibiya, Yemen ilaa Soomaaliya ilaa Filibiin.

Laakiin Pentagon-ka waxa ay Al-Shabaab u aragtaa in ay yihiin garabka ugu awoodda badan Al-Qaacida, waxaana lagu qiyaasaa 5,000 ilaa 7,000 oo dagaalyahan. Si looga hortago faafitaanka kooxda, Wasaaradda Difaaca tan iyo 2007 waxay qabatay hawlgallo gaar ah oo qarsoodi ah oo ka dhan ah.

Dagaalkaas gaarka ah ayaa inta badan loo igmaday awooda cirka kadib amarkii Trump ee daqiiqadihii ugu dambeeyay, iyadoo duqeymaha cirka ay noqdeen qaabkii dhabta ahaa ee looga adkaan lahaa al-Shabaab.

Laakin kadib markii Biden uu xafiiska la wareegay, maamulka ayaa si deg deg ah u dhimay tirada duqeymaha diyaaradaha aan duuliyaha laheyn ee Mareykanka ee ka dhanka ah Al-Shabaab, waxaana dib loo eegayaa go’aanka Trump.

Intii lagu guda jiray qiimeynta, oo qayb ka ahayd indho-indhayn ballaaran oo lagu eegayo halka laga qaybinayo ciidamada Mareykanka ee dibadda, ayaa kumaandooska Mareykanka loo oggolaaday inay booqdaan Soomaaliya si ay u tababaraan cutubyada dagaalyahannada maxalliga ah.

Laakiin saraakiisha sare ee difaaca ayaa ku doodaya in ay aad waxtar u yeelan lahayd in askarta maxalliga ah ay dagaallamaan oo ay ka garab tababaraan ciidamada howlgallada gaarka ah ee Mareykanka ee Soomaaliya. Waxa kale oo ay fududaan lahayd in la isku duwo weerarrada cirka ee ciidamada dhulka jooga.

Inkasta oo Biden uusan ku dhawaaqin go’aankiisa, waxay u muuqataa in militarigu heli doonaan dhammaan ciidamada uu ka doonayo dalka, ayay yiraahdeen saraakiisha.

“Waxaan aaminsanahay in nala siin doono ogolaansho mustaqbalka dhow si aan awood ugu yeelano joogitaanka joogtada ah ee Soomaaliya” sarkaal sare oo ka tirsan ciidamada ayaa u sheegay Wargeyska The Hill.

The post Saraakiil sare oo Mareykan ah oo Joe Biden u gudbiyey codsi ku saabsan Soomaaliya appeared first on Caasimada Online.