Dowladda Soomaaliya oo si adag u cambaareysay wada-hadalka Somaliland iyo Taiwan

[Deeq A.]

Safiirka dowladda Soomaaliya u fadhiya waddanka Shiinaha Ambassador Cawaale Cali Kulane ayaa si adag u cambaareeyay wada-hadalka u socda Somaliland iyo Taiwan.

Safiirka ayaa maamulka Taiwan ku eedeeyay in ay xasilooni-darro ka abuurayso waqooyiga Soomaaliya kadib markii sida uu sheegay ay xiriir la samaysay maamul goonni-goosad ah oo aan cidna u aqoonsan dowlad madax-bannaan.

“Waanu cambaaraynaynaa qaabka ay Taiwan ula dhaqanto Somaliland, waxaanu mar walba ilaalin doonaa madax-banaanida qaranka Soomaaliya iyo midnimada dhuleed ee Soomaaliya haday tahay Taiwan ama cid kaleba”

“Habka Taiwan waa mid aad looga naxo marka laga eego macno ahaan sababtoo ah waxay abuuraysaa xasilooni darro ka dhacda Waqooyiga Soomaaliya,  iyo xasillooni darro ka dhacda gobolka iyada oo la samaynaysa xidhiidh diblomaasiyadeed gobol gooni-goosad ah” ayuu yiri safiirka.

Ambassador Cawaale Cali Kulane ayaa sidoo kale waxba kama jiraan ku tilmaamay heshiis kasta oo ay wada galeen Somaliland iyo maamulka Taiwan gaar ahaanna heshiiskii u danbeeyay ee la xiriiray Khayraadka badda. Wuxuu sheegay in dowladda Soomaaliya ay Taiwan u aqoonsantahay Gobol kamid ah dalka Shiinaha.

PUNTLAND POST

The post Dowladda Soomaaliya oo si adag u cambaareysay wada-hadalka Somaliland iyo Taiwan appeared first on Puntland Post.