Dagaal ka socda Caasimada Ukraine,Diyaarado la soo riday+Shacabka oo Hub loo qeybiyay

[Deeq A.]

Dagaal ka socda Caasimada Ukraine,Diyaarado la soo riday+Shacabka oo Hub loo qeybiyay

Askari baadhaya hadhaagii diyaaradii lagu soo riday magaalada Kyiv

Wararka ka imaanaya dalka Ukraine waxay sheegayaan in agagaarka caasimadda Kiev uu ka socdo dagaal xooggan xilli qaraxyo ay ka dhaceen halkaas.

Kiev ayaa waxaa laga maqlay qarax weyn oo ka dhacay agagaarka fagaaraha Maidan, waxaana la soo sheegayaa in qaraxyo kale ay ka dhaceen agagaarka Troieshchyna ee isla Kiev.

Gantaallo lagu garaacay Kiev ayaa aad looga maqlayay bartmaha magaalada, sida ay sheegayaan goobjoogayaal ku sugan halkaas.

Sida laga soo xigtay koox madaxbanaan, in kabadan 50 qarax iyo rasaas culus ayaa laga soo sheegay inay ka dhaceen meel u dhaw agagaarka beerta xayawaanada iyo agagaarka deegaanka Shuliavaka.

Weriyaha warbaahinta Fox News oo joogo halkaas ayaa kusoo warramayaa in magaalada haatan dhinacyo badan laga soo weeraray.

Waddada Peremohy waxaa lagu arkayay baabuur gubaneysa iyo uuuro madow oo cirka isku shareertay.

Dagaal culus ayaa sidoo kale laga soo sheegayaa meel u dhow garoon diyaaradeed oo ku yaalla Vasylkiv.

Ciidamada Ukraine ayaa ku andacoonaya inay ku guuleysteen inay Ruushka ka saaraan magaalada Mykolaiv ee dhacda badda madow.

Qaraxyo dhowr ah ayaa hadda laga maqlay magaalada Kyiv, halkaasoo ay hadda ka socdaan duqeymo xooggan.

Dowladda Ukraine ayaa sheegtay in 18,000 oo qoryaha daran dooriga u dhaca loo qaybiyay mutadawiciin doonaya in ay duullaanka Ruushka

Muuqaalo laga soo duubay duqeymaha maanta ayaa muujinayay gaadiidka gaashaaman oo ku sii siqaya degmooyinka waqooyi ee magaalada.

Dalalka Midowga Yurub ayaa cunaqabatayn ku soo rogay Vladimir Putin iyo wasiirka arrimaha dibadda Sergei Lavrov.

BBC-du waxay fahamsan tahay inay tahay cunaqabateyntani xannibaad dhanka dhaqaalha ah oo aanay ahayn mamnuuc dhanka safarada ah.

Madaxweynaha dalka Ukraine Volodymyr Zelensky ayaa wacad ku maray inuu difaaci doono madax banaanida dalkiisa uu ku soo duulay Ruushka.

Dhanka kale gaashaanbuurta Nato ayaa sheegtay in kumanaan askari oo dheeraad ah ay geyneyso bariga Yurub.

Dad badan ayaa ka qaxaya dalka Ukraine

Waxaa baraha bulshada lagu baahiyay muuqaal muujinaya dagaal xooggan oo ka socda magaalada Melitopol.

Wararka ayaa sheegaya in muuqaalkan uu muujinayo qeybta daawaynta kansarka ee isbitaal halkaasi ku yaalla oo lagu dhuftay walxaha qarxa.

In kasta oo barta twitter-ka ee muuqaalka la soo dhigay ay eedaynayso “ciidamada Ruushka”, haddana lama xaqiijin cidda soo ridday hubka gabay goobtaasi.

Hoos ka daawo muuqaalka

In #Melitopol, the occupiers shot at the hospital
In the video, a shell hit the oncology department. pic.twitter.com/aSAVZWe2E3

— NEXTA (@nexta_tv) February 25, 2022

 

Rag u dhashay dalka Ukrain ayaa lagu soo waramayaa in laga soocay qoysaskooda xilli ay isku dayayeen in ay dalka ka baxsadaan.

Ragga da’doodu u dhaxayso 18-60, islamarkana dagaalami kara , ayaa hadda laga mamnuucay inay ka gudbaan xadka.

Qaramada Midoobay ayaa sheegtay in ay kordhinayso howlgallada lagu caawinayo dadka rayidka ah ee uu saameeyay duulaanka Ruushka.

Qiyaastii in ka badan 100,000 oo qof ayaa guryahooda ka qaxay tan iyo intii uu dagaalka bilaabmay.

Wasaaradda arrimaha dibadda ee Mareykanka ayaa ku gacan seyrtay wadahadalka uu madaxweynaha Ruushka Vladamir Putin ugu baaqay dalka Ukraine, waxaana ay ku tilmaantay “mid aan aheyn diblomaasiyad dhab ah”.

Isagoo wariyeyaasha kula hadlayay Washington Jimcihii, af hayeenka waaxda arrimaha dibedda Ned Price wuxuu sheegay in dublamaasiyadu aysan ku shaqeeneyn” qoriga afkiisa”.

Qaran News