“Wadahadalka Somaliland Iyo Soomaaliya Waxa Cusleeyey Siyaasadaha Ka Jira Labadda Dal…” Wasiirkii Hore Ee Arrimaha Gudaha Soomaaliya

[Deeq A.]

Cabdi Maxamed Sabriye (Qarafaan) oo soo noqdey wasiirka arrimaha gudaha xukuumadda federaalka Soomaaliya, ayaa sheegay inuu tuhmayo, wadahadalada Soomaaliya iyo Somaliland in horumar laga gaadho inay cusleeyeen siyaasadaha ka jira magaalooyinka Muqdisho iyo Hargeysa.

Wuxuu carrabka ku dhuftay in wadahadalladii ugu dambeeyey markii lagu soo kala tagayey Jabuuti lagu ballamey in la isku soo noqdo muddo labba toddobaad gudahood ah, oo cabashooyin jiray la soo xaliyo.

Xukuumadda Somaliland ayaa doonaysay in si guud deeqda loo wada siiyo Soomaaliya oo ay qeyb ka ahayd, iyadoo saamigeeda gaar loogga dhigo mar waliba.

Sidoo kale, Somaliland ayaa dalbatey in maamulka hawada Soomaaliya labadda qeybood inay wada maamulaan, iyo qodobka saddexaad oo la xidhiidhey amniga.

Waxaa lagu heshiiyey in saddexda qodob aynnu soo xusney loo saaro saddex guddi farsamo oo soo diyaariya, sida uu sheegay Ex-wasiir Sabriye.

Wasiirka ayaa intaa ku daray in dhinacyadii u kala dab qaadayey labadda dhinac ee Midowga Yurub iyo Mareykanka, inay ku cuslaatey xalinta dalab ka imanayey Somaliland xalintiisa.

Dalabka Somaliland ayaa ahaa in guddiyada farsamo ee la magacaabo aanay qeyb ka noqon xubno ka soo jeedo Waqooyi, taasoo ay dowladda Soomaaliya maareyn weyday inaan lagu soo darin guddiyada xubno ka socda Waqooyi.

Ugu dambeyntii wasiir Sabriye, ayaa sheegay in xaaladdu dhaafi wayday ka soocista guddiyada farsamo xubnaha ka socda Waqooyi, taasna ay hakisay shirkii lagu ballansanaa in la isugu yimaado muddo labba toddobaad ah.

Cabdi Maxamed Sabriye, ayaa ahaa wasiirka arrimaha gudaha ee Soomaaliya, ee wada hadaladii ugu dambeeyey ee ay yeeshaan Soomaaliya iyo Somaliland, kaasoo ka dhacy dalka Jabuuti.

Wasiir Cabdi Qarafaan, wuxuu hoggaaminayey xiligii wadahadalka guddiga farsamo ee ka socday Soomaaliya.

Source