Ra’iisul Wasaare Rooble oo gaaray Baydhabo

[Deeq A.]

Ra’iisul Wasaaraha Xukuumadda Federaalka Soomaaliya Maxamed Xuseen Rooble iyo wafdi uu hoggaaminayo ayaa galabta gaaray magaalada Baydhaba ee xarunta KMG ee dowlad goboleedka Koonfur Galbeed, halkaas oo ay si diiran ugu soo dhaweeyeen madaxda iyo qeybaha kala duwan ee bulshada.

Ra’iisul Wasaare Rooble ayaa qeyb gali doona munaasabadda sanad guurada 3aad ee markii la doortay Madaxweynaha Koonfur Galbeed Cabdicasiis Xasan Maxamed (Laftagareen), isla markaana la qaadan doonna dowlad Goboleedka Koonfur Galbeed kulamo lagu dardargelinayo hannaanka doorashooyinka.

Ra’iisul Wasaare Maxamed Xuseen Rooble ayaa uga mahadceliyey bulshada Koonfur Galbeed soo dhaweynta diiran ee loo sameeyey isaga iyo wafdiga uu hoggaaminayo.

Sidoo kale, wafdiga Ra’iisul Wasaaraha ayaa inta uu joogo Baydhabo u kuurgeli doonna xaaladda abaaraha ku dhuftan deegaanka, si qiimeyn loogu sameeyo, maadaama ay Koonfur Galbeed kamid tahay meelaha ay sida daran u saameysay abaarta ku dhufatay qaar kamid ah gobollada dalka.

PUNTLAND POST

The post Ra’iisul Wasaare Rooble oo gaaray Baydhabo appeared first on Puntland Post.