Wadaad Muslim ah oo lagu xidhiiyey Qaraxii Kampala oo toogasho lagu dilay

[Deeq A.]

Wadaad Muslim ah oo lagu xidhiiyey Qaraxii Kampala oo toogasho lagu dilay

Howlgallo amniga lagu xaqiijinayo ayaa billowday tan iyo markii ay qaraxyadu ka dhaceen bartamaha magaalada Kampala

Ciidamada amaanka dalka Uganda ayaa toogasho ku dilay wadaad Muslim ah oo lagu eedeeyay in uu la shaqeynayay koox hubeysan oo lala xiriirinayo qaraxyo ismiidaamin ah oo ka dhacay Kampala.

Saraakiisha ayaa sheegay in Sheekh Muhammad Abaas Kirevu, uu shaqaaleysiiyay unugyo ay maamulaan kooxda Allied Democratic Forces (ADF), kuwaas oo sheegtay in ay daacad u yihiin kooxda isku magacawday dowladda Islaamiga ah.

Wadaadka waxaa lagu dilay meel ka baxsan magaalada Kampala.Ugu yaraan afar qof ayaa ku dhimatay weerarkii qaraxa ahaa ee ka dhacay bartamaha magaalada Kampala.

In ka badan 30 kale ayaa ku dhaawacantay weerarka, oo IS ay sheegtay in ay ka dambeysay, waxaana saraakiisha ay ku eedeeyeen kooxda ADF.

Jabhadda Islaamiga ah ee ADF waxaa Uganda lagu aasaasay sagaashamaadkii balse hadda waxa a saldhig u ah Jamhuuriyadda Dimuqraadiga ah ee Congo. Tan iyo markii ay wacad ku mareen inay daacad u yihiin ururka IS sanadka markuu ahaa 2019, ayaa waxa ay qaadeen werarro isdaba joog ah.

21 qof ayaa la xiray ka dib tan iyo weerarkii Talaadadii gilgilay caasimadda Uganda, iyadoo booliiska ay wacad ku mareen inay burburin doonaan unugyada ADF ee Kampala iyo guud ahaan dalka.

Afhayeenka booliiska Fred Enanga ayaa sheegay in 13 qof oo laga shakisan yahay, oo ay ku jiraan dhowr carruur ah, la qabtay xilli ay isku dayayeen in ay ka gudbaan xadka DR Congo.

Arbacadii, afar qof oo looga shakisan yahay inay ka tirsan yihiin ADF ayaa lagu dilay meel u dhow xuduudda.

Waxaa sidoo kale ay booliska ku raad joogaan wadaad kale oo lagu magacaabo Sheekh Suleymaan Nsubuga, kaas oo lagu eedeeyay in uu sameeyay tababarro la xiriira waxa ay dowladda ku tilmaamtay argagixisanimada, dadka xagjireynta loo qorayo, iyo bixinta agabka lagu sameeyo walxaha qarxa.

Weerarkii Talaadadii ayaa ahaa kii ugu dambeeyay ka dib tiro qaraxyo ah oo dhawaan ka dhacay Kampala.

Bishii la soo dhaafay, gabadh 20 sano jir ahayd oo kabalyeeri ahayd ayaa la dilay ka dib markii qalab looga dhex tagay maqaayad, ku taalla magaalada.

Maalmo ka dibna dhowr qof ayaa dhaawacmay ka dib markii qof isku soo xiray walxaha qarxa uu isku qarxiyay gaari bas ah oo marayay meel u dhow Kampala. Booliiska waxay sheegeen in labadoodaba lala xiriiriyay kooxda ADF.

Qaraxyadii Talaadadii dhacay ayaa astaan ​​u ahaa weerarkii ugu weynaa ee lala xiriiriyo ADF tan iyo markii ay xulafo la noqdeen ururka la baxay dowladda Islaamka ee IS.

 

Mar sii horreysayna Madaxweynaha Uganda ayaa sheegay in koox fallaago ah ay isku dayayeen in ay qarax ku weeraraan dadka u baroor diiqayay ku xigeenkii taliyaha booliska dalkaas.

Hadalka Museveni ayaa daba socday xarigga nin naftii hallige ahaa oo lagu qabtay degmada Pader ee ku taalla waqooyiga waddankaas.

Saraakiisha ayaa sheegay in ujeeddada ay ahayd in la weeraro goobta ay ka dhaceysay munaasabadda aaska Lokech, taas oo ay ka qayb galeen madax sar sare.

Ninka la qabtay waxa uu watay qalab laga sameeyo bambooyinka, sida ay mas’uuliyiinta sheegeen.

Waxyaabaha ninkaas lagu qabtay waxaa ka mid ah garanka la isku qarxiyo iyo qalab kale oo qarxisooyin ah.

Mr Museveni waxa uu sheegay in uu wadahadal kula jiro madaxweynaha Jamhuuriyadda Dimuqraaddiga ah ee Congo iyo madaxda ciidanka amniga, uuna kala hadlayo arrinta ku saabsan kooxda fallaagada ah oo lala xiriirinayo inay ka dambeyso weerarro dhawaan ka dhacay bariga Congo.

Janaraal Paul Lokech waxa uu ahaa taliye ku xigeenka ciidanka Uganda, wuxuuna ka soo shaqeeyay Soomaaliya ka dib markii ciidanka AMISOM la geeyay dalka.

Intii uu Soomaaliya ku sugnaa mar waxa uu ahaa taliyaha ciidamada Uganda ee gacanta ku hayay amniga xarunta madaxtooyada ee Villa Somalia.

Qaran News