Midowga Musharaxiinta oo war ka soo saaray doorashooyinka

[Deeq A.]

Golaha Midowga Musharraxiinta ayaa sheegay in ay walaac xoog leh ka qabaan dib u dhaca isdaba-joogga ah, daahfurnaan la’aanta iyo daaha ula kaca ah ee doorashooyinka federaalka Soomaaliya.

Golaha oo saaray war-saxaafadeed ayaa tilmaamay in xaaladda uu dalku ku sugan tahay aysan ahayn mid xamili karta doorasho loo daahiyo dano gurracan ama la boobo, taasina ay horseedi karto xaalad cakirnaan iyo colaad sokeeye.

Goluhu wuxuu ugu baaqay Ra’iisul Wasaare Rooble in uu tixgeliyo kalsoonidii ay shacabka Soomaaliyeed iyo saamileyda siyaasadeed siiyeen, mas’uuliyadiisana uu si dhab ah uga soo dhalaalo.

Golaha Midowga Musharaxiinta ayaa soo jeediyay Lix (6) qodob oo kala ah:

1- In la helo jadwal doorasho oo mideysan oo ay ku caddahay taariikhda billawga doorashada xubnaha Golaha Shacabka iyo dhammaadkeeda.

2- In ay doorashu noqoto mid si daahfurnaan leh ku dhacda, loona madaxbanneeyo odayaasha dhaqanka beesha kursiga ku astaysan soo xulista ergada, fursad simanna loo siiyo tartamayaasha oo idil, goobta doorashadu ka dhacaysana loo sinnaado.

3- Madaxda Dowlad Goboleedyadu waxay awood u lahaayeen magacaabista kuraasta Aqalka Sare. Shacabka Soomaaliyeed iyo beesha caalamkaba waxay marag ka ahaayeen sidii loogu takrifalay doorashadii Aqalka Sare marka laga reebo meelo kooban.

4- Goluhu wuxuu ka dhigayaa cawaaqib xumida ka dhalan karta in la boobo doorashada kuraasta Golaha Shacabka. Dalkeenu wuxuu ka soo kabanayaa colaad sokeeye, doorasho la boobana natiijadeedu waa colaad sokeeye, sidaas darteed waa in aan si wadajir ah uga hortagnaa boobka doorashada.

5-In la helo korjoogto ka socota bulshada rayidka ah iyo beesha caalamka, si loo hubiyo hufnaanta doorashada.

6- Goluhu ma aqbali doono doorasho aan jadwalkeedu caddeyn oo maalinba kuraas tiro yar la shaacinayo. Wuxuu kaloo aqbali doonin doorasho la boobo, lagu shubto oo beelihii xaqa u lahaa kursiga la dulsaaro dad aysan iyagu soo dooranin.

PUNTLAND POST

The post Midowga Musharaxiinta oo war ka soo saaray doorashooyinka appeared first on Puntland Post.