Hoggaamiyaha Falaagada Tigray-ga oo War cusub & Mawqif cusub ka soo saaray Dagaalka Ethiopia

[Deeq A.]

Hoggaamiyaha Falaagada Tigray-ga oo War cusub & Mawqif cusub ka soo saaray Dagaalka Ethiopia

 

 Hoggaamiyaha Tigray-ga ayaa sheegay inay ka go’an tahay in wada-xaajood lagu dhammeeyo dagaalka sagaalka bilood ka socda gobolka ee ay ku dhinteen kumanaanka qof, islamarkaana in ka badan nus milyan kale ay ku barakaceen. 

Warqad uu u diray xoghayaha guud ee QM Antonio Guterres, oo ay aragtay wakaaladda wararka AP, ayuu Debretsion Gebremichael ku sheegay in Tigray-ga ay doonayaan dhex-dhexaadin aan dhinac u janjeedhin.

Hase yeeshee waxa uu ka digay in Midowga Afrika, oo xaruntiisu tahay Ethiopia “uusan wax hal u keeni karin dagaalka” sababtoo ah ururkan ayaa horey u taageeray dagaalka dawladda Ethiopia ay ku qaaday gobolka Tigray. 

Arrintan ayaa cakireysa hindise uu Midowga Afrika ku dhawaaqay Khamiistii oo uu u magacaabay madaxweynihii hore ee Nigeria Olusegun Obasanjo inuu noqdo ergayga gaarka ah ee ururka Midowga Afrika u qaabilsan Geeska Afrika.

Caqabadda kale ee jirta ayaa ah in dowladda Ethiopia ay ku shaanbadeysay ururka TPLF ee Tigray inuu yahay urur argagixiso, taasi oo macnaheedu yahay inaysan wada-hadal la geli karin.

Safiirka Kenya ee QM Martin Kimani ayaa Golaha Ammaanka u sheegay inay muhiim tahay in dowladda Ethiopia ay ka laabato go’aanka ay TPLF ugu yeedhay argagixiso, si wada-hadallo loo furo.

Dhinaca kale, dagaalka Tigray ayaa toddobaadyadii tegay kusii faafay gobollada Amhara iyo Canfarta ee deriska la ah, ayada oo ciidamada TPLF ay dhul badan qabsadeen.

Waxay tani kasii dartay xaaladda gobolka, ayada oo ay sii kordhayaan dadka barakacay, oo kuwa badan oo ka mid ah laga cabsi qabo inay gaajo iyo macluul u dhintaan.

Debretsion ayaa sheegay in dowladda Ethiopia ay dooneyso inay gaajo u le’daan shacabka Tigray.

“Ujeeddada waxay tahay in la cidhib-tiro Tigray-ga ayada macluul loo dilayo,” ayuu yidhi Debretsion oo tixraacaya xanibaado la sheegay in dowladda Ethiopia ay saartay gargaarka ay hay’adaha caalamiga gaynayaan gobolka.

Qaran News