Dagaal ismiidaamin ku bilowday oo ciidamada Dowladda iyo Al-Shabaab ku dhex maray Sabiib

[Deeq A.]

Afgooye (Caasimada Online) – Kooxda Al-Shabaab ayaa saaka waabarigii hore weerar culus  oo ku bilowday isqarxin kusoo qaaday saldhigga ay ciidamada Dowladda ku leeyihiin Buundada Sabiib oo dhinaca koonfur kaga beegan degmada Afgooye ee Gobolka Shabeellaha Hoose.

Dagaalka oo ahaa mid la isku adeegsaday hubka noocyadiisa kala duwan ayaa waxaa dhawaqa rasaasta laga maqlayey gudaha magaalada Afgooye, wuxuuna dagaalka socday ku dhawaad 2 saac.

Saraakiil ka tirsan ciidamada Dowladda ayaa sheegay inay iska caabiyeen ciidamadii ka tirsanaa Al-Shabaab ee weerarka soo qaaday isla markaasna ay gaarsiiyeen khasaaro xoog leh.

Kooxda Al-Shabaab ayaa dhinaceeda sheegtay inay la wareegtay deegaanka Sabiib oo illaa 8Km u jira Degmada Afgooye ee Gobolka Shabeelada Hoose, isla markaasna ay dagaalka ku qabsatay gaadiid dagaal iyo saanad ciidan.

Warka kasoo baxay Ururka Al-Shabaab ee ku aadan inay dagaal kula wareegeen degaanka Sabiid ee Gobolka Shabeellaha Hoose ayaa waxaan weli ka hadlin saraakiisha Ciidamada dowladda Soomaaliya & Maamulka degmada Afgooye.

Ciidamada Dowladda Soomaaliya ayaa sanad ka hor la wareegay deegaanka Sabiib kadib dagaalo culus oo halkaas ka dhacay, kooxda Al-Shabaab ayaana wixii markaas ka dambeeyey dhowr jeer weeraro gaadmo ah kusoo qaaday saldhigga ciidamada Dowladda.

The post Dagaal ismiidaamin ku bilowday oo ciidamada Dowladda iyo Al-Shabaab ku dhex maray Sabiib appeared first on Caasimada Online.