Suudaan oo sheegtay inay Al-bashiir ku wareejin doonto maxkamadadda ICC

[Deeq A.]

Golaha wasiirradu ee xukuumadda Suudaan ayaa go’aansatay in madaxweynihii hore ee dalkaasi Cumar Al-Bashiir iyo laba sarkaal  lagu wareejiyo  maxakamadda caalamiga ee dambiyada dagaalka  ICC,sida ay sheegtay wasiirka arrimaha dibadda Suudaan Mariam al-Mahdi .

Wasiirka oo la hadashay wakaaladda wararka SUNA ee dalkaasi,ayaa xaqiijisay go’aankaasi ay gaareen golaha wasiirada, balse ma caddayn waqtiga ay dhaceyso in Al-bashiir loo gacangaliyo maxkamadda caalamiga ah ee ICC.

Al-Bashiir oo 77-sano jir ah ayaa in ka badan 10 sano waxaa baadi-goobaysay maxkamadda ICC-ee fadhigeedu yahay magaalada Hague, waxaana lagu eedeeyay xasuuq, dambiyo dagaal iyo dambiyo ka dhan ah aadanaha oo ka dhacay gobolka Daarfuur.

Qaramada Midoobay ayaa sheegtay in 300,000 oo qof ay ku dhinteen dagaaladii ka dhacay Daarfuur, 2.5 milyan oo kalena ay ku barakaceen colaaddaasi oo gobolkaasi oo dhaca  galbeedka ka bilowday sannadkii 2003 -dii.

PUNTLAND POST

The post Suudaan oo sheegtay inay Al-bashiir ku wareejin doonto maxkamadadda ICC appeared first on Puntland Post.